رەسەي پرەزيدەنتى ۆلاديمير پۋتين «ۆاگنەر» جەكەمەنشىك اسكەري كومپانياسىنىڭ كوتەرىلىسى كەزىندە اسكەري ۇشقىشتاردىڭ قازا تاپقانىن مويىندادى، دەپ حابارلايدى «ادىرنا» ءتىلشىسى.
«قازا تاپقان ۇشقىشتاردىڭ باتىلدىعى ەلىمىزدى قۇتقارىپ قالدى»، - دەدى باسشى «ءبىرىنشى ارنانىڭ» ەفيرىندە سويلەگەن سوزىندە.
مەملەكەت باسشىسى دۇرىس شەشىم قابىلداپ، كەرى شەگىنگەن جالدامالىلارعا العىسىن ءبىلدىردى.
«سىزدەرگە العىس ايتامىز. رەسەي قورعانىس مينيسترلىگىمەن كەلىسىمشارت جاساسىپ، تۋعان-تۋىستارىڭىزعا نەمەسە بەلارۋسكە بارۋدى ۇسىنامىز. مەن بەرگەن ۋادە ورىندالادى.تاڭداۋ ءوز ەرىكتەرىڭىزدە. بىراق بۇل ءوزىنىڭ قايعىلى قاتەلىگىن تۇسىنگەن رەسەيلىك ساربازداردىڭ تاڭداۋى بولاتىنىنا سەنىمدىمىن»،—دەدى پۋتين.
سونداي-اق پرەزيدەنت قانتوگىستى بولدىرماۋعا باعىتتالعان قادامدار ونىڭ تىكەلەي نۇسقاۋى بويىنشا جاسالعانىن اتاپ ءوتتى.
ەسكە سالايىق، 24 ماۋسىمعا قاراعان ءتۇنى پريگوجين رەسەيدىڭ رەسمي اسكەري باسشىلىعىن سوققى بەردى دەپ ايىپتاپ، ءوزى "ادىلەت مارشى" دەپ اتاعان اسكەري نارازىلىق شاراسىن وتكىزگەن. ولار دونداعى روستوۆ قالاسىنان ماسكەۋگە 200 شاقىرىم قالعانشا ءجۇرىپ بارعان. بۇلىك فاكتىسى بويىنشا قىلمىستىق ءىس قوزعالدى. سول كەزدە جاساعان مالىمدەمەسىندە پۋتين پريگوجيندى "ساتقىن" دەپ ايىپتاعان بولاتىن. "بۇل – ساتقىندىق. شامادان تىس امبيتسيالار ساتقىندىققا اكەلدى،" - دەگەن بولاتىن رەسەي باسشىسى. الايدا سوڭعتسى ساتتە، رەسمي نۇسقا بويىنشا، بەلارۋس پرەزيدەنتى الەكساندر لۋكاشەنكونىڭ اراشالاۋىمەن پريگوجين مامىلەگە كەلىپ، اسكەرىن ماسكەۋدەن كەرى قايتاردى. سونداي-اق رەسەي پرەزيدەنتىنىڭ ءباسپاسوز حاتشىسى قىلمىستىق ءىستى توقتاتۋ تۋرالى شەشىم قابىلدانعانىن حابارلاعان.
