Алматыда «Ұлы Жібек Жолымен–2023» ХI Халықаралық кітап және полиграфия жәрмеңкесі өтті, деп хабарлайды «Адырна» тілшісі.
Іс-шараның негізгі мақсаты – Қазақстан аумағы бойынша кітаптардың таралуына, қолжетімді болуына үлес қосу.
Көрмеге Қазақстан, Ресей, Қырғызстан, Өзбекстан, Әзербайжан елдерінің жетекші баспалары, полиграфиялық компаниялары мен кітапханаларының өкілдері қатысты.
Іс-шара барысында жас ұрпаққа қазақ ауыз әдебиетінің жауһарлары тереңірек таныстырылды.
«Ұлы Жібек Жолымен–2023» ХI Халықаралық кітап және полиграфия жәрмеңкесінде ұлттық дәстүрде тәрбиелеуді мақсат еткен 17 кітаптан тұратын «Ұлы Дала фольклоры» топтамасы «Балалар мен жасөспірімдерге арналған ең үздік көркем және танымдық кітап» номинациясын қанжығасына байлады.
Ал Мемлекеттік сыйлықтың иегері Ғалым Жайлыбайдың «Атамұра» баспасынан шыққан «Жалғыз қарағай» атты жыр жинағы «Поэзия саласы бойынша ең үздік көркем басылым» номинациясын жеңіп алды.
