6 ساۋىردەن باستاپ ۇلىتاۋ وبلىسىندا «تازا قازاقستان» رەسپۋبليكالىق ەكولوگيالىق اكتسياسى اياسىندا بىرقاتار ءىس-شارالار وتۋدە، دەپ حابارلايدى "ادىرنا" ءتىلشىسى.
اكتسيا اياسىندا وبلىس تۇرعىندارى جالپىوبلىستىق سەنبىلىككە شىعىپ، وعان بارلىعى 437 ەڭبەك ۇجىمدارىنان 6 مىڭنان استام ادام قاتىستى. سەنبىلىككە 110 ارنايى تەحنيكا جۇمىلدىرىلىپ، 470 گەكتار اۋماق قوقىستان تازارتىلدى. بارلىعى 56 رۇقسات ەتىلمەگەن قوقىس ورنى جويىلىپ، اۋلالارعا جاڭا قوقىس كونتەينەرلەرى ورناتىلدى.
سەنبىلىك بارىسىندا سونىمەن قاتار، 965 اعاشتىڭ قۋراعان بۇتاقتارى كەسىلىپ، 85 ءتۇپ تال وتىرعىزىلدى.
اكتسيا اياسىنداعى تازالىق جۇمىستارى جەكسەنبى كۇنى دە جالعاسۋدا. وبلىستىڭ قالا، اۋداندارىندا قۋراعان اعاشتار كەسىلىپ، قاردىڭ ەرۋى سالدارىنان بۇلىنگەن اۋلالار مەن كوپشىلىك ورىندار، جول بويى قالىپقا كەلتىرىلۋدە.
ەستەرىڭىزگە سالساق، «تازا قازاقستان» ەكولوگيالىق اكتسياسى 6 ساۋىردە باستالىپ، 4 مامىرعا دەيىن جالعاسادى. اكتسيا اياسىندا تاريحي-مادەني ەسكەرتكىشتەر ماڭىندا، ارداگەرلەردىڭ ۇيلەرىندە سەنبىلىكتەر وتكىزىپ، جاپپاي اعاش وتىرعىزۋ جوسپارلانعان.
