ءۇندىستاننىڭ باتىسىنداعى احمەداباد قالاسىندا اپاتقا ۇشىراعان Boeing 787 Dreamliner ۇشاعىنىڭ 265 ءمايىتى قالاداعى ورتالىق اۋرۋحاناعا جەتكىزىلدى، دەپ حابارلايدى "ادىرنا" ۇلتتىق پورتالى Report اگەنتتىگىنە سىلتەمە جاساپ.
بۇل تۋرالى قالالىق پوليتسيا وكىلى كانان دەساي جۋرناليستەرگە مالىمدەگەن.
«ءبىز العان ەسەپكە سايكەس، قازىرگى ۋاقىتتا 265 ادامنىڭ دەنەسى اۋرۋحاناعا جەتكىزىلدى»، - دەدى ول.
بۇعان دەيىن ءۇندىستاننىڭ ىشكى ىستەر ءمينيسترى اميت شاح اپات ورنىنان مايىتتەردى شىعارۋ جۇمىستارى دەرلىك اياقتالعانىن حابارلاعان ەدى. الايدا، ناقتى قۇرباندار سانى دنق ساراپتامالارىنان كەيىن عانا بەلگىلى بولماق.
The New Indian Express گازەتىنىڭ مالىمەتىنە سايكەس، اپاتتان 310-نان استام ادام قازا تاپقان. ولاردىڭ ىشىندە ۇشاقتاعى جولاۋشىلار عانا ەمەس، ۇشاق قۇلاعان اۋداننىڭ تۇرعىندارى دا بار.
مينيستر اميت شاح تراگەديا ورنىنا بارىپ، قازىرگى ۋاقىتتا قۇربانداردىڭ تۋىستارىنان دنق ۇلگىلەرى الىنىپ جاتقانىن ايتتى.
«قۇربانداردىڭ تۇلعاسىن انىقتاۋ ءۇشىن شامامەن مىڭعا جۋىق دنق ساراپتاماسى جۇرگىزىلەدى»، – دەدى مينيستر.
بۇل — ۇندىستانداعى ەڭ ءىرى اۋە اپاتتارىنىڭ ءبىرى رەتىندە تىركەلۋى مۇمكىن. رەسمي ورگاندار ناقتى سەبەپتەر مەن قۇرباندار سانىنا قاتىستى قوسىمشا اقپاراتتى الداعى كۇندەرى جاريالايدى.
ەسكە سالا كەتەيىك، ماۋسىم كۇنى احمەداباد–لوندون Gatwick باعىتىنداعى ۆoeing 787‑8 ۇشاعى اپاتقا ۇشىراپ، بورتتا بولعان 242 جولاۋشىنىڭ بىرەۋى عانا امان قالعان ەدى.
