Мемлекет басшысы Қасым-Жомарт Тоқаев АҚШ-тың 47-ші сайланған президенті Дональд Трамппен сөйлесті. Бұл туралы Ақорда мәлімдеді, деп хабарлайды “Адырна” ұлттық порталы.
«Қасым-Жомарт Тоқаев АҚШ-тың сайланған президенті Дональд Трамппен телефон арқылы сөйлесті. Қасым-Жомарт Тоқаев Дональд Трампты Америка Құрама Штаттарының Президенті лауазымына сайлануымен құттықтады», — делінген бейсенбі күні таратқан хабарламада.
Атап өткендей, саясаткерлер сауда, инвестиция және ядролық қаруды таратпау саласындағы стратегиялық әріптестікті қарқынды дамытуға өзара бейілділігін растады.
«Мемлекет басшысы халықаралық күн тәртібіндегі ең өзекті мәселелер бойынша Қазақстанның ұстанымын баяндады. Президенттер екіжақты ынтымақтастықтың жоғары қарқынын сақтау мақсатында тұрақты байланыстар туралы келісті», - деп толықтырды Ақорда.
