تايلاندتا ۇلتتىق پوليتسيا اۆياوتريادىنا تيەسىلى ۇشاق اپاتقا ۇشىرادى. اۋە كەمەسى چا-ام قالاسىنىڭ جاعالاۋىنان شامامەن 100 مەتر قاشىقتىقتا تەڭىزگە قۇلادى. Thai PBS مالىمەتىنشە، قايعىلى وقيعا سالدارىنان بورتتا بولعان التى ادامنىڭ بارلىعى قازا تاپتى، دەپ حابارلايدى “ادىرنا” ۇلتتىق پورتالى.
اپاتقا ۇشىراعان ۇشاق — DHC6-400 Twin Otter ۇلگىسىندەگى اۋە كەمەسى. پوليتسيا بۇل ۇشاقتى جەدەل ماقساتتاردا، جۇك پەن قىزمەتكەرلەردى تاسىمالداۋ ءۇشىن پايدالانعان. اپات بولعان كۇنى بورتتا جاتتىعۋ الدىندا پاراشيۋتپەن سەكىرۋگە دايىندالىپ جاتقان پوليتسەيلەر بولعان.
وقيعا ورنىنا كەلگەن قۇتقارۋشىلار ىزدەستىرۋ جۇمىستارىن باستادى. الدىمەن بەس پوليتسەيدىڭ ءمايىتى تابىلدى. تاعى ءبىر جولاۋشى اۋىر جاراقاتپەن اۋرۋحاناعا جەتكىزىلدى، الايدا ول كوز جۇمدى. وسىلايشا، اپاتتان قازا تاپقاندار سانى التى ادامعا جەتتى.
پوليتسيا وكىلى، گەنەرال-لەيتەنانت ارچايون كرايتونگتىڭ ايتۋىنشا، اپاتتىڭ ناقتى سەبەبى ازىرگە بەلگىسىز. تايلاند قۇقىق قورعاۋ ورگاندارى وقيعانىڭ بارلىق ءمان-جايىن انىقتاۋ ءۇشىن جان-جاقتى تەرگەۋ جۇرگىزىپ جاتىر.
