تۇركيا پرەزيدەنتى رەجەپ تايىپ ەردوعان جاڭا كونستيتۋتسيا قابىلداۋدى ۇسىندى. بۇل تۋرالى ول 19 مامىردا جاستارمەن جانە جاس سپورتشىلارمەن وتكەن كەزدەسۋدە ايتتى، دەپ حابارلايدى «ادىرنا» ءتىلشىسى.
ءوز سوزىندە پرەزيدەنت كونستيتۋتسيانى جاڭارتۋ قاجەتتىگىنە ەرەكشە نازار اۋداردى.
«قازىرگى قولدانىستاعى نەگىزگى زاڭ – دەموكراتيالىق وزگەرىستەرگە دەيىنگى كەزەڭدە قابىلدانعان، سوندىقتان ول زامان تالابىنا ساي ەمەس. ءبىز سىزدەرمەن، جاستارمەن بىرگە، قازىرگى زامان رۋحىنا جانە كەلەشەك ۇرپاقتىڭ قاجەتتىلىكتەرىنە ساي جاڭا كونستيتۋتسيا جاسايمىز»، – دەپ اتاپ ءوتتى ول.
سونداي-اق ەردوعان تۇركيانىڭ نىق قاداممەن العا باسىپ، جاڭا جەتىستىكتەرگە قول جەتكىزىپ جاتقانىن اتاپ ءوتتى. ول جاقىن ارادا تۇركيا تەرروريزم قاۋپىنەن تولىقتاي ارىلاتىنىنا سەنىم ءبىلدىردى.
«ءبىز سىزدەرگە تەرروريزمنەن ازات تۇركيانى امانات ەتەمىز. وسىدان كەيىن تۇركيا عاسىرىن جۇزەگە اسىرۋ پروتسەسى ودان ءارى جەدەلدەيتىن بولادى»، — دەدى مەملەكەت باسشىسى.
