Елімізде сыбайлас жемқорлықтың орын алуы жайлы хабарлаған азаматтарға берілетін сыйақы мөлшері артты. Бұл туралы ҚР сыбайлас жемқорлыққа қарсы іс-қимыл агенттігінің елордалық департаментіндегі превенция және парасаттылық басқармасының басшысы Марат Хайруллин елордадағы Antikor ortalyǵy алаңында онлайн өткен баспасөз мәслихатында мәлімдеді, деп хабарлайды «Адырна» ұлттық порталы.
«Экономикалық ынтымақтастық және даму ұйымы елдерінің тәжірибесі бойынша (Германия, Ұлыбритания, АҚШ) сыйақы сомасы сараланған сомаға айналды. Енді пара немесе келтірілген залал сомасы 1 мың АЕК-тен (2 млн 917 мың теңге) аспайтын сыбайлас жемқорлық құқық бұзушылық туралы хабарлама үшін сыйақы (қылмыстың ауырлығына байланысты) 30-дан 100 АЕК-ке дейінгі соманы құрайды. Көрсетілген сомадан артық – сыйақы көлемі 10% - ды құрайды, бірақ 4 мың АЕК-тен аспайды (11 млн 668 мың теңге) Бұрын сыйақыны көтермелеудің ең жоғары мөлшері 100 айлық есептік көрсеткіштен (291 мың 700 теңге) аспайтын», - дейді ол.
Аталған сыйақы республикалық бюджет қаражаты есебінен жүргізіледі.
"Адырна" ұлттық порталы
