Қазақстандықтар Telegram-да вакцина құрамында магнит бөлшектер бар екені туралы теорияны тағы да таратып жатыр. Бұл жолы «дәлел» ретінде доктор Джейн Рубидің сұхбаты алынған. Ол магнит бөлшектер вакцина құрамындағы mRNA-ны адам ағзасындағы жасушаларға «итеру» үшін қажет деп мәлімдеген, деп хабарлайды «Адырна» ұлттық порталы Stopfake.kz сайтына сілтеме жасап.
Портал мәліметінше, шын мәнінде Джейн Руби дәрігер емес. Ол өзін денсаулық сақтау экономисті және психология докторы дәрежесі бар саяси сарапшы ретінде таныстырады.
Бұған дейін ол COVID-19 пандемиясына байланысты жалған ақпарат таратқаны үшін байқалған. Бұл жолы ол COVID-19-дың алдын алуға арналған препараттар өндірісінде магнит бөлшектер әдейі қолданатынын мәлімдеген. Ол вакцина алған адамдардың қолына магниттің тартылу «құбылысын» осылай түсіндіреді, делінген порталда.
Қазіргі уақытта ғалымдар ДНҚ вакциналарын өндіруде қолдануға болатын суперпарамагнитті нонобөлшектерді зерттеумен айналысып жатыр. Алайда ДНҚ платформасында жасалған бірде-бір вакцина жоқ. Сонымен қатар суперпарамагнитті нанобөлшектерді қолдану тек зерттеу сатысында және дәрі-дәрмек өндіруде қолданылмайды.
Портал ақпаратына сүйенсек, Pfizer/BioNTech және Moderna сияқты мРНҚ вакциналарында липидті нанобөлшектер жасушаларға мРНҚ-ны жеткізу үшін қолданылады. Олар магниттік қасиетке ие емес және ағзаға зиян келтірместен қысқа уақыт ішінде ыдырайды. Басқа вакциналарда, соның ішінде Қазақстанда қолданылатын екпелерде магнит бөлшектер жоқ.
"Адырна" ұлттық порталы
