قازاقستان رەسپۋبليكاسى پرەزيدەنتىنىڭ جارلىعىمەن تالدىقورعانداعى اۆيابازانىڭ كەلىسىم شارت بويىنشا اسكەري قىزمەتشىسى ەفرەيتور (مارقۇم) عابدوللا سمايىلقانوۆقا ءىىى دارەجەلى «ايبىن» وردەنى بەرىلدى، دەپ حابارلايدى «ادىرنا» ءتىلشىسى ۆەدومستۆونىڭ ءباسپاسوز قىزمەتىنە سىلتەمە جاساپ.
وردەندى اكەسى عالىم ازانبەكوۆكە تابىستادى.
«بۇل ءبارىمىز ءۇشىن ورنى تولماس قايعى. كۇش-جىگەرى تاسىپ تۇرعان جاستاردىڭ ارامىزدان كەتۋى وتە اۋىر. ۇلىڭىز سوڭىنا دەيىن اسكەري پارىزى مەن انتىنا ادال بولدى. ول ءبىزدىڭ جادىمىزدا ماڭگى ساقتالادى. قارۋلى كۇشتەردىڭ بارلىق جەكە قۇرامى مەن قورعانىس مينيسترلىگىنىڭ باسشىلىعى سىزگە قايعىرىپ كوڭىل ايتادى، – دەدى اۋە شابۋىلىنا قارسى قورعانىس اسكەرلەرىنىڭ قولباسشىسى گەنەرال-مايور قايرات سادىقوۆ.
قورعانىس مينيسترلىگى اۆياتسيا بازاسىنىڭ مامانى ەفرەيتور عابدوللا سمايىلقانوۆ تالدىقورعان قالاسىندا تەرروريستتەردىڭ قولىنان قازا تاپتى. ول قىزمەتتىك پارىزىن ورىنداۋ بارىسىندا اۋىر جاراقات العان بولاتىن.
عابدوللا عالىمۇلى سمايىلقانوۆ 1996 جىلى 6 ساۋىردە الماتى وبلىسى، قارابۇلاق كەنتىندە دۇنيەگە كەلگەن. عابدوللا نەبارى 25 جاستا عانا ەدى.
مارقۇمنىڭ ارتىندا جۇبايى، ۇلى مەن قىزى قالدى. قورعانىس مينيسترلىگى وتباسىن تۇرعىن ۇيمەن قامتاماسىز ەتىپ، قاجەتتى ماتەريالدىق كومەك كورسەتەتىن بولادى. اسكەري ءبولىم عابدوللا سمايىلقانوۆتىڭ وتباسىن ءوز قامقورلىعىنا الدى.
«ادىرنا» ۇلتتىق پورتالى
