شىمكەنت قالالىق قوعامدىق كەڭەس مۇشەلەرى قابىلداۋ وتكىزدى. قازاقستان حالقى اسسامبلەياسىنىڭ عيماراتىندا وتكەن قابىلداۋعا ءتۇرلى ماسەلەلەرى بار 7 تۇرعىن جازىلعان. ولاردىڭ ارىز-تالابىن نۇرعازى بۇحارباەۆ باستاعان كەڭەس مۇشەلەرى تىڭدادى. ولاردىڭ قاتارىندا جۇماعالي بىلىسبەكوۆ، نۇرجان اجيمەتوۆ، باۋىرجان التەەۆ، ەرسۇلتان امىربەك سىندى ەل اعالارى بار.
قابىلداۋعا كەلگەن ازاماتتاردىڭ ارقايسىسى مۇڭ-مۇقتاجىن ارقالاي كەلگەن. ماسەلەن، ايگەرىم ورىنباساروۆا باسپانا سۇرايدى.ونىڭ ايتۋىنشا، جۇبايىنىڭ مۇگەدەكتىگى بار. بەس بالالى كەلىنشەك ەكى پەرزەنتىم مۇمكىندىگى شەكتەۋلى رەتىندە ەسەپتە تۇرادى دەيدى. يپوتەكامەن ءۇي الۋعا قارجىسى جەتپەيدى. ونىڭ ۇستىنە ەكى بالاسىنىڭ ءدارى-دارمەگىنە اي سايىن قىرۋار قارجى كەتەدى، ال باسپانا كەزەگىم باياۋ جىلجيدى دەگەن مۇقتاجىن جەتكىزدى.
كوپ بالالى ايەلدىڭ ءوتىنىشىن تىڭداعان نۇرعازى باقتىبايۇلى بارلىق ماسەلە زاڭ اياسىندا شەشىلەتىنىن، مۇمكىندىگى شەكتەۋلى جاندارعا مەملەكەت تاراپىنان بارىنشا جاعداي جاسالىپ وتىرعانىن جەتكىزدى. ال تۇرعىننىڭ ءوتىنىشىن دەپۋتاتتار نازارىنا جەتكىزەتىنەن ايتتى.
بۇل كۇنى قابىلداۋعا كەلگەن ازاماتتاردىڭ كوبىسى ءۇي ماسەلەسى بويىنشا وتىنىشتەرىن جەتكىزدى. دەگەنمەن، ارالارىندا مۇمكىندىگى شەكتەۋلى جاندار مەن شالعاي شاعىناۋدانداعى كورشىلەرىنىڭ تىلەگىن ارقالاي كەلگەن تۇرعىندار دا بار. قوعامدىق كەڭەس مۇشەلەرى ولاردىڭ بارلىعىن مۇقيات تىڭداپ، ءتيىستى كەڭەستەرىن بەردى. ايتا كەتەيىك، قوعامدىق قابىلداۋ 17-21 قاڭتار ارالىعىندا جالعاسادى.
نۋرلان بەكتاەۆ
