شىمكەنت قالاسىندا “Samgau” رەسپۋبليكالىق قىسقامەتراجدى فيلمدەر فەستيۆالى ءوتتى. شارا شىمكەنت قالاسى اكىمدىگىنىڭ قولداۋىمەن ۇيىمداستىرىلدى. ماقساتى – ۇلتتىق كينووندىرىستىڭ دامۋىنا سەرپىن بەرۋ، شىعارماشىل جاستاردى قولداۋ جانە جاڭا ەسىمدەردى كينو كەڭىستىگىنە تانىتۋ.
فەستيۆالگە قازاقستاننىڭ تۇكپىر-تۇكپىرىنەن 18 بەن 35 جاس ارالىعىنداعى جاس رەجيسسەرلەر مەن پروديۋسەرلەر قاتىسىپ، ءتۇرلى جانر مەن تاقىرىپتاعى تۋىندىلارىن ۇسىندى. ۇيىمداستىرۋشىلارعا 30-دان استام قىسقامەتراجدى فيلم كەلىپ ءتۇسىپ، ولاردىڭ ىشىنەن ىرىكتەلگەن 20 ۇزدىك تۋىندى اقتىق كەزەڭگە ءوتتى.
فيلمدەر كەلەسى تاقىرىپتار بويىنشا قابىلداندى: «شىمكەنت – سۇيىكتى قالام!»، «مەن جانە الەم»، «ۇلتتىق قۇندىلىق – تاربيە نەگىزى»، «جۇمىسشى ماماندىقتاردىڭ ءرولى»، «ەكولوگيا»، ء«تىلىمىزدىڭ تاعدىرى – ءبىزدىڭ قولىمىزدا». بۇل تاقىرىپتار بۇگىنگى قوعامداعى وزەكتى ماسەلەلەردى كوتەرىپ، جاستاردىڭ كوزقاراسىن، وي-تولعاۋىن بەينەلەۋگە جول اشتى.
فەستيۆال اياسىندا وتكەن سالتاناتتى اشىلۋ ءراسىمى شىمكەنت قالاسىنداعى جاستار رەسۋرستىق ورتالىعىندا ءوتتى. ءىس-شاراعا قالا اكىمىنىڭ ورىنباسارى سارسەن قۇرانبەك جانە ەلىمىزدىڭ كينو سالاسىنداعى بەلگىلى تۇلعالار، ونەر مايتالماندارى مەن باق وكىلدەرى قاتىستى. قازىلار القاسى قۇرامىندا قر ەڭبەك سىڭىرگەن قايراتكەرى، بەلگىلى پروديۋسەر قانات تورەباي، كانن فەستيۆالىنىڭ “ۇزدىك اكتريسا” جۇلدەگەرى سامال ەسلياموۆا، “ايكا” ءفيلمىنىڭ رەجيسسەرى، كانن لاۋرەاتى سەرگەي دۆورتسەۆوي، «قوشقار مەن تەكە» انيماتسيالىق فيلمىمەن تانىمال رەجيسسەر باتىرحان داۋرەنبەكوۆ جانە قازاقستان كينەماتوگرافيستەر وداعىنىڭ توراعاسى اداي ءابىلدينوۆ بولدى.
“Samgau” فەستيۆالى – بۇل جاي عانا بايقاۋ ەمەس، سونىمەن قاتار جاس كينوگەرلەر ءۇشىن تاجىريبە الماسىپ، شىعارماشىلىق بايلانىس ورناتاتىن الاڭ. جاستاردىڭ كينو ءتىلى ارقىلى ءوز ويىن جەتكىزۋى – قازاق كينوسىنىڭ جاڭا بۋىنى قالىپتاسىپ كەلە جاتقانىن كورسەتەدى. فەستيۆال كورەرمەندەرگە تىڭ تاقىرىپتار مەن جاڭا ەسىمدەردى تانىستىرىپ، ۇلتتىق كينووندىرىستىڭ بولاشاعىنا سەنىم ۇيالاتتى.
