ۇلتتىق وليمپيادا كوميتەتى 2022 جىلعى بەيجىڭ وليمپياداسىنا ارنالعان قازاقستان قۇراماسىنىڭ فورماسىن كوپشىلىك نازارىنا ۇسىندى، - دەپ حابارلايدى "ادىرنا" ۇلتتىق پورتالى "olympic.kz" سايتىنا سىلتەمە جاساپ.
قازاقستان تاريحىندا العاش رەت ەكيپيروۆكاداعى ەل اتاۋى قازاق تىلىندە Qazaqstan بولىپ جازىلاتىنى ايتىلدى.
"قازاقستان قۇراماسىنىڭ وليمپياداعا ارنالعان سپورتتىق فورماسىن قازاقستاندىق ZIBROO كومپانياسى شىعاردى. شەرۋگە ارنالعان كوللەكتسيانى رەسەيلىك ديزاينەر، SHISHKIN برەندىنىڭ نەگىزىن قالاۋشى دميتري شيشكين دايىنداعان. ەكى ءوندىرۋشى دە ەڭ جوعارى تالاپتارعا ساي كەلەتىن، وندىرىستە ەكو-شەشىمگە ساي كەلەتىن ءارى كيىم ديزاينىنىڭ الەمدىك ترەندىن قولداناتىن ورتاق ەپيكيروۆكا كوللەكتسياسىن ۇسىندى", - دەلىنگەن حابارلامادا.
باسىلىم مالىمەتىنشە، قازاقستان قۇراماسىنىڭ وليمپيادا ەكيپيروۆكاسىن دايىنداۋعا ءبىر جىلدان اسا ۋاقىت كەتكەن. كيىمدى دايىنداۋ پروتسەسىنە اتلەتتەردىڭ وزدەرى دە قاتىسقان. ولار فورمانىڭ ديزاينى، ساپاسىنا قاتىستى ءوز ۇسىنىستارىن بىلدىرگەن.
ء"بىر اپتادان سوڭ قازاقستان قۇراماسى قىتايعا ۇشىپ كەتەدى. ال 4 اقپان كۇنى تورتجىلدىقتىڭ باستى دوداسى - قىسقى وليمپيادا باستالادى. توكيو قارساڭىنداعى سەكىلدى، ويىن باستالاردان بۇرىن ەكيپيروۆكانى دايىنداۋ كەزىندە سپورتشىلاردىڭ ۇسىنىس-تىلەگىن ەسكەردىك. ءبىز ءۇشىن وليمپيادا ويىندارىندا سپورتشىلارعا وسى فورمانىڭ ىڭعايلى، قولايلى جانە ءساندى بولعانى ماڭىزدى. ال ماتا مەن تىگىستىڭ ەڭ جوعارى تالاپقا ساي بولاتىنى ءسوزسىز", - دەيدى ۇوك باس حاتشىسى اندرەي كريۋكوۆ.
قىسقى ويىندارعا ارنالعان فورمانىڭ تانىستىرىلىمىنا جازعى سپورت تۇرلەرىنىڭ وكىلدەرى، سونىڭ ىشىندە، توكيو وليمپياداسىنىڭ جۇلدەگەرلەرى قامشىبەك قوڭقاباەۆ، ساكەن بيبوسىنوۆ پەن سوفيا بەرۋلتسەۆا قاتىستى. سونداي-اق، فوتوسەسسياعا دزيۋدوشىلار جانساي سماعۇلوۆ پەن اقمارال ناۋاتبەك، بوكستان ەرلەر كومانداسىنىڭ كاپيتانى ابىلايحان ءجۇسىپوۆ، گيمناست ارۋجان قاسەنوۆا مەن "بارىس" حوككەيشىسى سامات دانيار قاتىستى.
ء"بىزدىڭ قۇرامانىڭ فورماسىنىڭ تانىستىرىلىمىنا قۋانا-قۋانا قاتىستىم. سپورتتىق كۇنتىزبەمىزدەگى ايىرماشىلىقتارعا بايلانىستى قىسقى سپورت تۇرىندەگى اتلەتتەرمەن ءجيى كەزدەسپەسەك تە، ولاردىڭ بىزگە كورسەتكەن قولداۋىن ۇمىتقان ەمەسپىز. تيىسىنشە ءبىز دە وليمپيادا كەزىندە وتانداستارىمىزدىڭ جانكۇيەرى بولامىز. ويتكەنى ءبىز ءبىر كوماندانىڭ - قازاقستان قۇراماسىنىڭ نامىسىن قورعايمىز. فورماعا كەلەر بولساق، ساپاسى قاتتى ۇنادى. كۇرتەشەلەر جەڭىل ءارى جىلى، ديزاينى دا جيناقى. قازاقستان ءسوزىنىڭ "Q" ارقىلى، ياعني قازاقشا جازىلعانى كوڭىلگە جىلى تيەدى ەكەن. بۇل فورما بەيجىڭگە اتتاناتىن بارلىق سپورتشىمىزعا ۇنايتىنىنا سەنىمدىمىن. وليمپيادا ويىندارىندا بارلىعىنا شىن جۇرەكتەن ساتتىلىك تىلەيمىن", - دەدى بوكستان توكيو وليمپياداسىنىڭ جۇلدەگەرى، الەم چەمپيونى ساكەن بيبوسىنوۆ.
"فورمانىڭ تانىستىرىلىمىنا شاقىرتۋ العانىمدا تاڭعالدىم ءارى قۋاندىم. ويتكەنى قىسقى سپورتتاعى اتلەتتەرىمىزدىڭ ناتيجەسىن ۇنەمى قاداعالاپ جۇرەمىن. ءبىر كۇن بويى ءوزىمىزدى مودەل سەزىندىك. مۇنداي قىزىق جوباعا قاتىسۋ مەن ءۇشىن ۇلكەن تاجىريبە بولدى. فورما قاتتى ۇنادى، ءتۇسى دە، ەپيكيروۆكا ساپاسى دا قۋانتادى. وتە جىلى ءارى دەنەگە جاقسى تۇرادى. سپورتشىلار جابىق عيماراتتاردا دا، ۇلكەن ستاديونداردا دا وزدەرىن ىڭعايلى سەزىنەتىنى انىق. ايتپاقشى، ولاردىڭ فورماسى ەڭ ءساندى بولاتىنىنا كۇمانىم جوق. الداعى ەڭ ماڭىزدى جارىستا قۇراماعا ساتتىلىك تىلەيمىن. العا!", - دەدى توكيو وليمپياداسىنىڭ جۇلدەگەرى، كاراتەشى سوفيا بەرۋلتسەۆا.
كيىمدەگى جازۋعا بىرەگەي شريفت تاڭدالعان. جارىستى قابىلداۋشى ەلدىڭ داستۇرلەرى دە نازاردان تىس قالماعان. وليمپيادا وتەتىن جىل سۋ جولبارىسى جىلىمەن سايكەس كەلەدى، ال شىعىس كۇنتىزبەسى بويىنشا 2022 جىلعى ءتۇس "تالاپتارىنا" اسپان كوك، قارا جانە اق ءتۇس سايكەس كەلەدى.
كيىم قىتايداعى قىسقى كليماتقا ارنايى ويلاستىرىلعان. مۇندا تەمپەراتۋرا كەي كەزدەرى 20 گرادۋستان دا تومەندەيدى. سوندىقتان سىرت كيىم تابيعي قاز جۇنىمەن جاسالعان، جىلۋدى ساقتاپ، سۋىقتى وتكىزبەيتىن زاماناۋي ماتەريالدار قولدانىلعان. كولەمىنە قاراماستان، كيىمنىڭ سالماعى از، ەركىن قوزعالۋعا ىڭعايلى. ديزاينەرلەردىڭ ويىنشا، سپورتشىلار بۇل فورمانى سپورتتىق ارەنادان باسقا جەرلەرگە دە كيە الادى.
ەسكە سالايىق، قىسقى وليمپيادا ويىندارى 4 اقپان كۇنى بەيجىڭدە باستالىپ، 20 اقپانعا دەيىن سوزىلادى. قازاقستان قۇراماسى سپورتتىڭ 8 تۇرىنەن باق سىنايدى.
