"ەكى اپتا "ايداۋدا" بولعان عازيز باسىم ازەر "اقتالىپ" شىقتى. جارتى اي تەرگەلىپ، تەرروريست ەمەس ەكەنىمە تەرگەگەندەر زورعا كوزدەرى جەتتى. تەرگەلۋ ءتاسىلىنىڭ نەسىن ايتايىن؟ كادىمگى ورىستىڭ كريمينالنىي كينوسىنداعى كورىنىس قوي. قۋات برات ايتىپ قويىپتى. قوسىپ الارىم جوق. ەش وكىنبەيمىن. ەل اۋزىندا "تۇسىنىكسىز تراگەديا" اتالىپ كەتكەن بۇل وقيعانىڭ تەرگەلۋىن ورتاسىنان كوردىم قايتا. ۇرەي، ۇركىتۋدى مەنسىز- اق ءمىنسىز اتقارىپ جاتىر عوي...
ءسال قىزىعىن ايتايىن. مەنىمەن بىرگە تەلەفونىم دا "تۇتقىندالدى". سودان قىزىق... ءار چات، ءار گرۋپپا، ءار ءسوزىڭدى اشىپ تەكسەرمەي ما؟ مەندە نە بولسىن، ول جاعىنان ۋايىم بولعان جوق. ويتكەنى، ەشكىمدى شاقىرعانىم جوق، قايتا جان-جاقتان ۋلاماي-شۋلاماي، ديالوگقا كەلەيىك، ءۋاجىمىزدى حاتقا ءتۇسىرىپ ايتايىق دەگەنىمە جازىقتى بولدىم...".
بۇدان بولەك جۋرناليست جەرگىلىكتى بيلىك وكىلدەرى ونىڭ سوڭىنا تۇسكەنىن، سونىڭ سالدارىنان وسىنداي جاعدايعا تاپ بولعانىن اتاپ ءوتتى.
"جاپپاي قاماۋ كەزىندە ىرقىنا كونبەگەن، ايداۋىنا ەرمەگەن بەلسەندىلەردى قاماتۋدىڭ، تۇقىرتۋدىڭ تاماشا ءساتىن تاپقانداي. تەرگەۋ انىقتالماي جاتىپ وبلىس اكىمىنىڭ ورىنباسارى ارىپتەستەرگە ەندى نۇرادين كورەسىنى كورەدى دەپ سالەمدەمە جەتكىزگەنىن قالاي تۇسىنەم؟ عيماراتى ورتەنگەن پارتيا باسشىسى مەنى مىسال ەتىپ تىلشىلەردى ۇرەيلەندىرگەننەن نە ۇتتى؟ كەيىن پرەزيدەنت ناقاق جالا جابىلماسىن، تەرگەۋ ءادىل ءوتسىن دەگەن سىڭايدا ۇندەۋ تاستادى عوي. سول سەبەپ بولدى ما، ايتەۋىر كەيىنگى كۇندەرى تەرگەۋ كىشكەنە تەرگەۋگە ۇقسادى", —دەپ جازدى ول پاراقشاسىندا.
نۇرادين راقايدىڭ ارىپتەستەرى ونىڭ تەرگەلگەنىنە ەمەس، سوققىعا جىعىلعانىنا قاتتى قىنجىلىپ، بۇل زاڭعا قايشى ەكەنىن ايتىپ پىكىر بىلدىرۋدە.
"كەشە نۇرادين راقايعا جاعدايىن بىلەيىن دەپ حابارلاستىم. ءجاي تەرگەلىپ جۇرگەن بولار دەپ تەرەڭ ءمان بەرگەنىمىزگە وكىنىپ قالدىق. كۇشتىك قۇرىلىمدار جۋرناليست ارىپتەسىمىزدى ابدەن سوققىعا جىعىپتى. “بۇيرەكتەن بۇيرەك قالمادى، ءتىپتى ىستەمەي قالدى” دەيدى.