ناۋرىز - جىل باسى، اينالانىڭ جاڭارۋ تۇسى. بۇل كەزدە تابيعات ۇيقىسىنان ويانىپ، ۇيدەگى تىرشىلىككە جان بىتەدى. كوكتەمگى مەرەكەنى جەتى ءتۇرلى تاعامنان ازىرلەنەتىن كوجەسىز ەلەستەتۋ مۇمكىن ەمەس. استانا قالاسى اكىمدىگى رەسمي سايتىنىڭ تىلشىلەرى 93 جاستاعى اجەي دايىنداعان مەرەكەلىك سۋسىننىڭ ءدامىن تاتىپ، ونىڭ كونە دە ەرەكشە قۇرامىن ءبىلىپ قايتتى.
اينەش اپانىڭ شاڭىراعىندا ناۋرىز مەرەكەسىن ەرەكشە قاستەرلەيدى. 93 جاسار قاريانىڭ بالالارى، نەمەرەلەرى مەن شوبەرەلەرى اق جاۋلىقتى اناسىن ورتاعا الىپ، ۇلىستىڭ ۇلى كۇنىن بارلىعى بىرگە قارسى الۋعا تىرىسادى.
جىلدا وسى كۇنى قارت انا تاڭ اتىسىمەن ەرتە تۇرىپ، ناۋرىز كوجەنى ازىرلەيدى ەكەن. ول قوناقتارىنىڭ كەلگەن ۋاقىتىندا سۋسىننىڭ دايىن بولۋىنىڭ قامىن جاسايدى. سول سەبەپتى بۇل ىسكە ەشكىمدى ارالاستىرمايدى دا.
ء"بىز كىشكەنتايىمىزدان اجەلەرىمىزدىڭ جانىندا ءجۇرىپ، وسى سۋسىندى قالاي پىسىرىلەتىنىن كورىپ جۇردىك. ايەلدەردىڭ ارقايسىسى ناۋرىز كوجەنى ءارتۇرلى دايىندايدى عوي. مىسالى، مەن كوجە قىشقىل بولسىن دەپ ەتتىڭ سورپاسىنا قۇرتتى ەزىپ قوسامىن. سوندا قۇرتتىڭ تۇزى دا سورپاعا جاقسى ءسىڭىپ، كوجە تاتىمدى بولا تۇسەدى. كەزىندە مەنىڭ انام وسىلاي ىستەيتىن. كەيبىر كەلىنشەكتەر سورپاعا قۇرتتى ەمەس، ايراندى قوسادى", - دەپ ءبولىستى اينەش سامتىكوۆا.
"كەزىندە ناۋرىز كوجەنى دالادا تايقازانعا پىسىرەتىنبىز. كوجە دايىن بولعان سوڭ، ونى جيىرما-وتىز شاقتى ادام بىرنەشە كەسەلەپ ىشەتىن ەدى. باستىسى، ەت پىسكەنگە دەيىن ونى ۇزاق قايناتۋ كەرەك. سۇرلەنگەن ەت بولسا، ءتىپتى جاقسى", – دەدى اجەي داستارحان كوجەنى كەسەگە ساپىرا قۇيىپ.
ول ناۋرىز كوجەنى ىدىسقا تولتىرىپ قۇيىپ بەرىلەتىنىن ايتتى. بۇل - "جاڭا كەلگەن جىلدان نەسىبەسى ورتايماسىن" دەگەن بەلگىنى بىلدىرەدى.
"سول قۇيىلعان كوجەنى تاۋىسىپ ءىشۋ كەرەك، ايتپەسە ىرزىعى كەم بولادى", - دەدى اينەش اپا.
ناۋرىز كوجە ءاربىر ۇيدە كەلەر جىلعى توقشىلىق پەن ىرىس، قۇتتىڭ جورالعىسى رەتىندە داستارحانعا وزگە دە ۇلتتىق تاعامدارمەن قوسا مىندەتتى تۇردە قويىلادى. سامتىكوۆتاردىڭ ىشەتىن ناۋرىز كوجەسى وزگەشە، ارينە. قارت انانى قۇرمەت تۇتاتىن وتباسى ۇلكەن داستارحان باسىندا جينالىپ، اڭگىمەگە دۇكەن قۇرادى، حال سۇراسادى، قۋانىشتارىمەن بولىسەدى.
tengrinews.kz
