شىمكەنت قالاسىنىڭ اكىمى مۇرات ايتەنوۆ پروبلەمالىق ماسەلەلەردى شەشۋ ءۇشىن قاراتاۋ اۋدانىنىڭ بەلسەندى تۇرعىندارىمەن كەزدەستى. بەتپە-بەت فورماتتاعى كەزدەسۋدە اۋدانعا قاتىستى بارلىق سالالار بويىنشا ماسەلەلەر كوتەرىلدى. قالا اكىمى ءاربىر بەلسەندىنىڭ قوزعاعان ماسەلەسىن مۇقيات تىڭداپ، سۇراقتارعا جەكە-جەكە جاۋاپ بەردى.
تۇران شاعىناۋدان تۇرعىندارى مەكتەپكە بارار جولداردى جارىقتاندىرۋ، سۋاققى قويۋ ماسەلەسىن كوتەردى. جاڭادان بوي كوتەرىپ جاتقان شاعىن اۋدانداعى كوشەلەردى جارىقتاندىرۋ جۇمىستارى ەڭ الدىمەن الەۋمەتتىك نىسانداردارعا بارار جولعا جاسالاتىنىن ايتقان قالا اكىمى تۇراندى كوممۋنالدىق ينفراقۇرىلىممەن قامتۋ جۇمىستارى كەزەڭ-كەزەڭىمەن جۇزەگە اسىرىلاتىنىن جەتكىزدى.
ال، تاسساي ەلدى مەكەنىنىڭ تۇرعىندارى جاتاقحانانى كۇردەلى جوندەۋدەن وتكىزۋ جانە جاستارعا سپورت كەشەنىن سالىپ بەرۋ تۋرالى وتىنىشتەرىن جەتكىزدى.
قازىرگى تاڭدا مەملەكەت جان باسىنا قارجىلاندىرۋ جۇيەسىن جۇرگىزىپ جاتقانىن ايتقان شاhار باسشىسى بۇل رەتتە الەۋمەتتىك-كاسىپكەرلىك كورپوراتسيامەن بىرلەسە ەلدى مەكەندەرگە سپورت مەكەمەلەرىن سالۋعا جاعداي جاساۋ قاجەتتىگىن مالىمدەدى.
اسار-2 شاعىناۋدان حالقى ينفراقۇرىلىم جۇيەلەرى تارتىلىپ جاتقانىن ايتا كەلە، ەندىگى كەزەكتە كوشەلەرگە اتاۋ بەرۋدى سۇرادى.
قالا اكىمى كوشەگە اتاۋ بەرۋ تارتىبىمەن جۇزەگە اسىرىلاتىنىن جانە بۇل ماسەلە بيىل شەشىمىن تاباتىنىن ايتتى.
مۇرات دۇيسەنبەكۇلى وسىنداي كەزدەسۋلەر ماسەلەلەردىڭ ماڭىزىن ايقىنداۋ جانە بىرلەسە جۇمىس اتقارۋ ءۇشىن وتە قاجەت ەكەنىن اتاپ ءوتتى.
شىمكەنت قالاسى اكىمدىگىنىڭ ءباسپاسوز قىزمەتى
