الماتىداعى بەيبەرەكەت كەزىندە وتاعاسىنان ايىرىلىپ، قارا جامىلعان كوپبالالى انا گۇلزيا ومارباەۆا ەندى دالادا قالۋى مۇمكىن. بۇل تۋرالى “ادىرنا” ۇلتتىق پورتالى الماتى ارناسىنا سالتەمە جاساي وتىرىپ حابارلايدى.
ارنانىڭ حابارلاۋىنشا، 10 جىلداي جالعا الىپ تۇرىپ جاتقان پاتەرىن ءۇي يەسى بوساتسىن دەپ تالاپ ەتۋدە. جەسىر ايەل پاتەردىڭ اقشاسىن تولەي الماي، 6 بالاسىمەن قايدا بارارىن بىلمەي دال.
قاڭتاردىڭ قاندى قىرعىنىندا قازا تاپقان ازاماتتىڭ ارتىندا قالعان ايەلى دە، 6 بالاسى دا قازىرگى تاڭدا ناعاشىلارىنىڭ ءۇيىن پانالاي تۇرۋعا ءماجبۇر. سەبەبى ولار بۇعان دەيىن جالدامالى پاتەردە تۇرىپ كەلگەن. وتاعاسىنان ايىرىلعاننان كەيىن جالعا العان پاتەردىڭ اقىسىن تولەي الماي قالعان.
«ۋاقىتىندا تولەي الماعان كەزدە ماعان «بوساتىڭدار» دەپ ايتقان. ال مەن 6 بالاممەن قايدا بارامىن؟ ەش جەرگە المايدى. «ۋاقىتىندا تولەي الماساڭدار، بوساتاسىڭدار» دەپ ايتقان. وسى جولى دا جازىپتى، ول كىسى ەستىمەگەن بە، بىلمەيمىن. مەن تەلەفون كوتەرە المادىم. سودان «ۋاقىتىندا اقشانى سالۋىڭ كەرەك ەدى عوي، نەگە سالمادىڭ؟» دەپ جازىپتى. ءالى ول كىسىگە ايتقان جوقپىن، كورشىلەر ايتپاسا. كورشى كىسىلەرگە «تۇرسىن نەمەسە بوساتسىن» دەپ ايتىپتى»، - دەيدى كوپبالالى انا گۇلزيا ومارباەۆا.
ءبىر قىزىعى، قارا جامىلعان وتباسىنىڭ ميتينگكە قاتىسى بار دەگەن نەگىزبەن ولاردان كورشىلەرى دە الشاق جۇرگىسى كەلەدى ەكەن. كوپبالالى انانىڭ ايتۋى بويىنشا، جۇبايى 5 قاڭتاردا بەيبىت شەرۋگە قاتىسقان. كەيىننەن ونى كۇدىكتى دەپ تانىپ، قاماۋعا العان. سول جەردە ونىڭ مەرت بولعانى بەلگىلى بولدى. كۇيەۋىنىڭ قايتىس بولعانى تۋرالى انىقتامادا ونىڭ پانكرەاتيتتەن كوز جۇمعانى جازىلىپتى.
«كۇندەلىكتى نانىن اكەلىپ بەرىپ، بىردەڭە قىلىپ كۇن كورىپ جۇرگەن جانۇيالار اكەسىز قالدى. سول جاعىنان قانداي كومەك بەرۋ كەرەك ەكەنىن بىلمەيمىن. بىراق ايەلدەردىڭ جاعدايى مۇشكىل. بالالارىن مەكتەپكە ورنالاستىرا الماي جاتىر. وعان ءبىز كومەكتەسىپ جاتىرمىز. پاتەر اۋىستىرۋ كەرەك بولىپ جاتىر. بالالاردىڭ قايتا-قايتا مەكتەپ اۋىستىرعانى دا بولمايدى»، - دەدى الاتاۋ اۋداندىق «باقىتتى وتباسى» ورتالىعىنىڭ جەتەكشىسى اقمارال باسيروۆا.
اقمارال باسيروۆا «باقىتتى وتباسى» ورتالىعى تاراپىنان جەسىر قالعان ايەلدەرگە قولداۋ كورسەتىلىپ جاتقانىن ايتتى. ال گۇلزيا ومارباەۆاعا جومارت جاندار پاتەر سىيلاۋعا نيەتتى. سونىمەن قاتار، كوپبالالى انالاردىڭ ماسەلەسى قالالىق اكىمدىكتە دە كوتەرىلمەك.
”ادىرنا” ۇلتتىق پورتالى
