Almatydaǵy beıbereket kezinde otaǵasynan aıyrylyp, qara jamylǵan kópbalaly ana Gúlzııa Omarbaeva endi dalada qalýy múmkin. Bul týraly “Adyrna” ulttyq portaly Almaty arnasyna sálteme jasaı otyryp habarlaıdy.
Arnanyń habarlaýynsha, 10 jyldaı jalǵa alyp turyp jatqan páterin úı ıesi bosatsyn dep talap etýde. Jesir áıel páterdiń aqshasyn tóleı almaı, 6 balasymen qaıda bararyn bilmeı dal.
Qańtardyń qandy qyrǵynynda qaza tapqan azamattyń artynda qalǵan áıeli de, 6 balasy da qazirgi tańda naǵashylarynyń úıin panalaı turýǵa májbúr. Sebebi olar buǵan deıin jaldamaly páterde turyp kelgen. Otaǵasynan aıyrylǵannan keıin jalǵa alǵan páterdiń aqysyn tóleı almaı qalǵan.
«Ýaqytynda tóleı almaǵan kezde maǵan «Bosatyńdar» dep aıtqan. Al men 6 balammen qaıda baramyn? Esh jerge almaıdy. «Ýaqytynda tóleı almasańdar, bosatasyńdar» dep aıtqan. Osy joly da jazypty, ol kisi estimegen be, bilmeımin. Men telefon kótere almadym. Sodan «Ýaqytynda aqshany salýyń kerek edi ǵoı, nege salmadyń?» dep jazypty. Áli ol kisige aıtqan joqpyn, kórshiler aıtpasa. Kórshi kisilerge «Tursyn nemese bosatsyn» dep aıtypty», - deıdi kópbalaly ana Gúlzııa Omarbaeva.
Bir qyzyǵy, qara jamylǵan otbasynyń mıtıngke qatysy bar degen negizben olardan kórshileri de alshaq júrgisi keledi eken. Kópbalaly ananyń aıtýy boıynsha, jubaıy 5 qańtarda beıbit sherýge qatysqan. Keıinnen ony kúdikti dep tanyp, qamaýǵa alǵan. Sol jerde onyń mert bolǵany belgili boldy. Kúıeýiniń qaıtys bolǵany týraly anyqtamada onyń pankreatıtten kóz jumǵany jazylypty.
«Kúndelikti nanyn ákelip berip, birdeńe qylyp kún kórip júrgen januıalar ákesiz qaldy. Sol jaǵynan qandaı kómek berý kerek ekenin bilmeımin. Biraq áıelderdiń jaǵdaıy múshkil. Balalaryn mektepke ornalastyra almaı jatyr. Oǵan biz kómektesip jatyrmyz. Páter aýystyrý kerek bolyp jatyr. Balalardyń qaıta-qaıta mektep aýystyrǵany da bolmaıdy», - dedi Alataý aýdandyq «Baqytty otbasy» ortalyǵynyń jetekshisi Aqmaral Basırova.
Aqmaral Basırova «Baqytty otbasy» ortalyǵy tarapynan jesir qalǵan áıelderge qoldaý kórsetilip jatqanyn aıtty. Al Gúlzııa Omarbaevaǵa jomart jandar páter syılaýǵa nıetti. Sonymen qatar, kópbalaly analardyń máselesi qalalyq ákimdikte de kóterilmek.
”Adyrna” ulttyq portaly
