قىرعىزستان مەن تاجىكستان شەكاراداعى اتىستى تولىعىمەن توقتاتۋ جونىندە كەلىسىمگە كەلدى. بۇل تۋرالى قىرعىزستان شەكارا قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
Stan.kz سايتىنىڭ مالىمەتىنشە، باتكەن وبلىسىنداعى پرەزيدەنت وكىلى، باتكەن وبلىسى بويىنشا شەكارا باسشىسى مەن تاجىكستاننىڭ سوعدى وبلىسىنىڭ گۋبەرناتورى رادجابب احمازودا مەن قۇزىرلى ورگان وكىلدەرى اراسىندا كەلىسسوز جۇرگىزىلىپ، مىناداي شەشىمگە كەلدى:
- اتىستى تولىعىمەن دوعارۋ;
- شەكاراعا تارتىلعان قوسىمشا كۇش پەن تەحنيكانى كەرى قايتارۋ;
- باتكەن-يسفانا باعىتىنداعى جولدى اشۋ;
- شەكارالاس ايماقتاردى جانجالدىڭ الدىن الۋ ماقساتىندا قىرعىزستان مەن تاجىكستان قۇقىق قورعاۋ ورگاندارىنىڭ بىرگە تورۋىلداۋى.
ەكى ەل دەلەگاتسياسى جانجال باستالعان تورت-كوچو ايماعىنا باردى. قازىر باتكەن-يسفانا تاس جولى اشىق.
قىرعىزستان ۇسىنعان جانجال سەبەبى
قىرعىزستان شەكارا قىزمەتىنىڭ مالىمەتىنشە، تورت-كوچ ايماعىنا 17:50 شاماسىندا تاس تيەلگەن جۇك كولىكتەرى كەلگەن. تاجىكستان ازاماتتارى تاستى ءتۇسىرىپ، باتكەن-يسفانا جولىن جاۋىپ تاستاعان. ولارمەن بىرگە تاجىكستان شەكاراشىلارى بىرگە كەلگەن. شەكارا وكىلدەرى كەزدەسىپ، تاس جولدى قايتا اشقان. دەگەنمەن جولدىڭ اشىلعانىنا قاراماستان چىر-دوبو ايماعىندا تاجىكستان قىرعىزستان اسكەريلەرىنە وق اتقان.
تاجىكستان ۇسىنعان اتىس سەبەبى
تاجىكستان قاۋىپسىزدىك كوميتەتى ۇسىنعان دەرەكتەرگە سۇيەنسەك، 27 قاڭتاردا جەرگىلىكتى ۋاقىت بويىنشا 17:20-دا باتكەن وبلىسىنداعى اقساي اۋدانىنىڭ 50 شاقتى تۇرعىنى حودجاي الو ەلدى مەكەنىندەگى كوپىردە جينالىپ، تاجىكستان ازاماتىنىڭ كولىگىن توقتاتقان.
ۆەدومستۆو مالىمەتىنشە، ەر ادام تاجىكستان اۋماعىندا حودجاي الو ەلدى مەكەنىنەن يسفارا اۋدانىنداعى سومونيەن اۋىلىنا قۇم اكەتىپ بارا جاتقان.
حابارلانعانداي، قۇقىق بۇزۋشىلىقتاردىڭ الدىن الۋ ءۇشىن باتكەن وبلىسى مەن سوعدى وبلىسىنىڭ قۇقىق قورعاۋ ورگانى وكىلدەرى كەزدەسۋ جوسپارلاعان.
كوميتەتتەگىلەردىڭ سوزىنشە، قىرعىز تاراپى بۇل كەزدەسۋگە كەلمەپتى.
"مۇنىڭ ورنىنا جەرگىلىكتى ۋاقىت بويىنشا 18:10-دا قىرعىز شەكاراشىلارى اتىس بەكىنىستەرىنەن تاجىكستان ازاماتتارىنا وق اتقان", - دەدى تاجىكستان قاۋىپسىزدىك كوميتەتى.
“ادىرنا” ۇلتتىق پورتالى
