قاڭتار ايىنىڭ باسىندا ەلىمىزدە بولعان قايعىلى وقيعالار كەزىندە سوڭعى دەرەكتەرگە سايكەس 225 ادام قازا تاپتى. ال ولاردىڭ ولىمىنە نە سەبەپ بولعانىن انىقتاۋ سوت ساراپشىلارىنا جۇكتەلگەن. وسىعان وراي قازاقپارات ءتىلشىسى قر ادىلەت مينيسترلىگىنىڭ سوت ساراپتاماسى ورتالىعى ديرەكتورىنىڭ ورىنباسارى ءىلياس يسمايلوۆتى سوزگە تارتتى، دەپ حابارلايدى «ادىرنا» ءتىلشىسى.
- ءىلياس جۇماعاليۇلى، قاڭتار وقيعالارىنا بايلانىستى سوت-مەديتسينا ساراپشىلارى جالپى قانداي جۇمىس جۇرگىزدى؟ سول قايعىلى كەزەڭدە ساراپشىلار قالاي ارەكەت ەتتى؟
- ول ۋاقىتتا قر ادىلەت مينيسترلىگىنىڭ سوت ساراپتاماسى ورتالىعى اۋماقتىق بولىمشەلەرىنىڭ سوت-مەديتسينا ساراپشىلارىنىڭ جۇمىسى كۇشەيتىلگەن رەجيمدە جۇرگىزىلدى. سوت-مەديتسينا ساراپشىلارى ەلىمىزدىڭ زاڭناماسىندا كوزدەلگەن وزدەرىنىڭ قىزمەتتىك مىندەتتەرىن ورىندادى.
- قاڭتار قاسىرەتى كەزىندە مايىتحاناعا جەتكىزىلگەن ادامداردىڭ ولىمىنە نە سەبەپ بولعان. وقتان نەمەسە باسقا دا دەنە جاراقاتىنان مەرت بولعاندار تۋرالى ناقتى دەرەكتەر بار ما؟ ورتەنگەن مۇردەلەر كەزدەستى مە؟ بانديتتەردىڭ، بۇزاقىلاردىڭ مۇردەسى جەتكىزىلدى مە؟ ولارعا جانە بەيبىت تۇرعىندارعا قاتىستى قانشا سوت-مەديتسينا ساراپتاماسى تاعايىندالدى؟
- سوت-ساراپتاما قىزمەتى تۋرالى زاڭناماعا سايكەس، سوت ساراپتاماسىن ۇيىمداستىرۋ جانە جۇرگىزۋ كەزىندە ءمالىم بولعان مالىمەتتەر جاريا ەتۋگە جاتپايدى. مۇنداي مالىمەتتەردى الۋ ءۇشىن وكىلەتتى ورگاندارعا جۇگىنۋگە كەڭەس بەرەر ەدىم. جالپى، مۇنداي مالىمەتتەردى جاريا ەتكەنى ءۇشىن ءتىپتى قىلمىستىق تا جاۋاپكەرشىلىك كوزدەلگەن.
- وندا قاڭتار وقيعاسىنا بايلانىستى قانشا سوت-مەديتسينا ساراپتاماسى تاعايىندالعانعا قاتىستى دەرەكتەرمەن بولىسسەڭىز. ولاردىڭ العاشقى ناتيجەسى قانداي؟
- بۇگىندە قاڭتار وقيعاسىنا قاتىستى 2 مىڭنان استام سوت-مەديتسينا، تاۋارلاردى تانۋ، قۇرىلىس، ءورت جانە جارىلىس-تەحنيكالىق، بالليستيكالىق ساراپتامالار جانە ساراپتامالاردىڭ وزگە دە تۇرلەرى تاعايىندالعان. بۇل سان كۇن سايىن وزگەرىپ وتىرادى دەسەم دە بولادى.
- جالپى، قازا تاپقانداردىڭ ولىمىنە نە سەبەپ بولعانىن انىقتاۋ ءۇشىن قانشا ۋاقىت كەتەدى؟
- ءولىم سەبەبىن انىقتاۋ بارىسى جاناما زەرتتەۋلەر كەشەنىن جۇرگىزۋدى كوزدەيدى. ولاردىڭ قاتارىندا حيميالىق-توكسيكولوگيالىق، بيولوگيالىق، سونىمەن قاتار گيستولوگيالىق زەرتتەۋلەر بار. وسىناۋ زەرتتەۋلەردىڭ ناتيجەسى وزگە دە مالىمەتتەرمەن جيناقتالا كەلە سوت-مەديتسينا ساراپشىلارىنىڭ قورىتىندى ازىرلەۋى بارىسىندا باعالاۋىنا جاتادى. بۇل رەتتە گيستولوگيالىق جانە حيميالىق-توكسولوگيالىق زەرتتەۋلەر ءوندىرىسىنىڭ پروتسەسى 20 جانە 25 تاۋلىككە دەيىن سوزىلۋى مۇمكىن. بىراق، ساراپشىلار ءوندىرىستى ونىڭ ساپاسىن زيان كەلتىرمەستەن جەدەل اياقتاۋعا تىرىسادى.
- ال وڭىرلەردە قانداي جۇمىس جۇرگىزىلدى؟
- جوعارىدا اتاپ وتكەنىمدەي، سوت ساراپتاماسى ورتالىعىنىڭ بارلىق وڭىردەگى اۋماقتىق بولىمشەسى كۇشەيتىلگەن رەجيمدە جۇمىس ىستەدى. بۇعان قوسا، جاپپاي تارتىپسىزدىك فاكتىلەرى ورىن العان وڭىرلەرگە كادرلاردى شوعىرلاندىرۋ قاجەتتىگىن ەسكەرە وتىرىپ، اتالعان وبلىستارعا جىبەرۋ ءۇشىن سوت ساراپشىلارىنىڭ جەتكىلىكتى رەزەرۆى جاساقتالدى. قازىردىڭ وزىندە الماتى قالاسىندا ساراپشىلار شتاتىن كۇشەيتۋ ءۇشىن قوسىمشا 26 مامان جىبەردىك. ءدال وسىنداي جۇمىس شىمكەنت قالاسىندا، جامبىل، قىزىلوردا، الماتى، اقتوبە جانە شىعىس قازاقستان وبلىستارىندا جۇرگىزىلدى. بۇل وڭىرلەرگە دە قاجەتتى كادرلىق رەزەرۆ دايىنداۋ ماسەلەسى جان-جاقتى پىسىقتالدى. ماتەريالداردىڭ كەلىپ تۇسۋىنە وراي ساراپشىلار اتالعان وڭىرلەرگە جىبەرىلەتىن بولادى.
- قانداي جاعدايدا ءولىمنىڭ سەبەبىن انىقتاۋ قيىندىق تۋدىرادى؟
- ءولىم سەبەبىن انىقتاۋدا قيىندىق تۋدىراتىن جايتتار ءىستىڭ ناقتى جاي-جاپسارىنا بايلانىستى. ايتالىق، ۋلانۋ، كۇيىك شالۋ جانە باسقالارى. مۇنداي جاعدايدا ءولىمنىڭ سەبەبىن انىقتاۋ ءۇشىن جوعارىدا اتاپ وتكەن زەرتتەۋلەردىڭ جاناما ادىستەرى قولدانىلادى.
