«Nur Otan» پارتياسىنىڭ توراعاسى قاسىم-جومارت كەمەلۇلى توقاەۆتىڭ قاۋلىسىمەن كەشە پارتيانىڭ اتقارۋشى حاتشىسى بولىپ ورالوۆ اسحات رازدىقۇلى تاعايىندالدى.
اسحات رازدىقۇلىن جاڭا قىزمەتىمەن شىن جۇرەكتەن قۇتتىقتايمىن!
ول - ماسكەۋدەگى حالىقارالىق قاتىناستار ۋنيۆەرسيتەتىن بىتىرگەن كاسىبي ديپلومات. ل.گۋميلەۆ اتىنداعى ەۇۋ ۋنيۆەرسيتەتىن تامامداعان سوڭ، سول وقۋ ورنىندا الەۋمەتتىك-تاربيە جۇمىستارى دەپارتامەنتىنىڭ جاستاردى ۇيىمداستىرۋ ءبولىمىنىڭ باس مامانى بولدى. جاستاردىڭ ءتۇرلى پروبلەماسىن كۇن تارتىبىنە شىعارىپ، تۇيىتكىلدى ماسەلەلەردىڭ وڭتايلى شەشىلۋىنە اسەر ەتتى. ەلوردامىزدىڭ جاستار ساياساتى باسقارماسىنىڭ باسشىسى رەتىندە دە بەلسەندى جۇمىس ىستەدى. مەملەكەتتىك ساياساتتىڭ نەگىزگى باعىتىنىڭ ءبىرى - جاستار سەكتورى دەسەك، اسحات باۋىرىمىز وسى سالانى قولداۋعا ارنالعان الەۋمەتتىك، قۇقىقتىق، ەكونوميكالىق شارالاردى شەبەر ۇيلەستىردى. “جاس وتان” جاستار قاناتىنىڭ كوشباسشىسى بولعان كەزدە دە اتالمىش ۇيىم قىزمەتى جاڭا دەڭگەيگە كوتەرىلدى.
پاۆلودار وبلىسى اكىمىنىڭ الەۋمەتتىك سالالار ءhام يدەولوگيا جونىندەگى ورىنباسارى، قر اقپارات جانە قوعامدىق دامۋ مينيسترلىگىنىڭ ۆيتسە-ءمينيسترى، ەلوردا اكىمىنىڭ ورىنباسارى سياقتى جاۋاپتى قىزمەتتەر اتقاردى.
اكىمنىڭ ورىنباسارى رەتىندە ءبىلىم بەرۋ، جاستار، مادەنيەت، ءدىن، دەنساۋلىق ساقتاۋ، جالپى الەۋمەتتىك سالالارداعى شيەلەنىسكەن پروبلەمالاردى قاداعالاپ، جەتىلدىرۋ جۇمىستارىن جوعارى دەڭگەيدە ۇيىمداستىرا الدى.
ول قازاقىلىقتىڭ ءيىسى اڭقىعان قاراپايىم وتباسىندا تاربيەلەنگەن. قازاق تاريحىن تەرەڭ بىلەدى. تاريحي تۇلعالارىمىزدىڭ ءومىر جولى مەن قىزمەتىن جان-جاقتى زەرتتەپ، زەردەلەگەن ىزدەنىمپاز ازامات. پاۆلودار وبلىسى اكىمىنىڭ ورىنباسارى لاۋازىمىندا بولعاندا قالا مەكتەپتەرىنە، كوشەلەرىنە ەلگە ەڭبەگى سىڭگەن ۇلتتىق تۇلعالارامىزدىڭ ەسىمىن بەرۋ تۋرالى باستاما كوتەرۋى دە سول ۇلتجاندىلىعىنىڭ دالەلى دەپ ويلايمىن. كەرەكۋ ورتالىعىنداعى ءبىر ۇلكەن كوشەگە ويشىل ءماشhۇر ءجۇسىپ كوپەيۇلى اتىنىڭ بەرىلۋى دە سول كەزدەگى باستى جاڭالىقتىڭ ءبىرى بولعان ەدى. استانامىزدا ءال-فارابي، ىبىراي التىنسارين جۇمابەك تاشەنوۆ، جاقسىلىق ۇشكەمپىروۆ سىندى دارا تۇلعالارىمىزدىڭ ەسكەرتكىشتەرىنىڭ اشىلۋى مەن مەكتەپتەردىڭ مۇستافا شوقاي، ءنازىر تورەقۇلوۆ، سماعۇل سادۋاقاسۇلى، مۇحتار اۋەزوۆ، ءىلياس ەسەنبەرلين، قانىش ساتپاەۆ، باۋىرجان مومىشۇلى، قايىم مۇحامەدحانوۆ سەكىلدى ۇلت ماقتانىشتارىنىڭ اتتارىمەن اتالۋىندا اسحاتتىڭ دا ەرەكشە ەڭبەگى بار. ەلگە قۇرمەتتى زيالى قاۋىم وكىلدەرىمەن اقىلداسىپ، كەڭەسىپ وتىراتىن بيازىلىعى دا - جاستارعا ۇلگى.
مەملەكەتتىك قىزمەتتە ابدەن ىسىلعان، كەز كەلگەن ءىستى دوڭگەلەتىپ، ۇيلەسىمدى جۇرگىزەتىن، پرەزيدەنت جاستار كادرلىق رەزەرۆىنىڭ مۇشەسى، ىسكەر اسحات رازدىقۇلى جاڭا قىزمەتىندە دە ابىرويلى بولاتىنىنا سەنەمىن جانە ساتتىلىك تىلەيمىن!
رينات كەرتاەۆ
