ءانشى مەرۋەرت تۇسىپباەۆا تۇسىندە قىتايدا ءومىر بويىنا تۇرمەگە قامالعان اقجارقىن تۇرلىبايدى كورىپتى. بۇل تۋرالى ول ءوزىنىڭ Instagram-پاراقشاسىندا ارنايى جازبا جاريالاپ، بيلىككە ۇندەۋ جاسادى، دەپ حابارلايدى "ادىرنا" ۇلتتىق پورتالى.
- بۇگىن تۇسىمدە اقجارقىن تۇرلىبايدى كورىپپىن…. ەشقاشان كورمەگەن، تىلدەسپەگەن ادام نەگە تۇسىڭە ەنەدى ەكەن؟! بالكىم ، كوپ ويلاعاننان شىعار…. قارشاداي قازاقتىڭ قىزى، تاعدىردىڭ تالكەگىمەن قايتا كەلمەس جاستىق شاعىن، تار قاپاستا، ءدىنى دە، ءتىلى دە بىزگە جات، وزگە ەلدە وتكىزۋدە. ءوز باسىم، اقجارقىن تۋرالى تىڭ مالىمەت پايدا بولسا، ەلەڭ ەتەمىن. باس بوستاندىعىنان ايىرىلىپ، #پوجيزنەننوەزاكليۋچەنيە قۇداي بەرگەن بار عۇمىرىن بوداندا وتكىزۋدەن اسقان قاسىرەت بار ما ادام بالاسىنا؟ ونىڭ ۇستىنە، نازىك قىز بالاعا…. بۇل وقيعا، شەتەلگە ءجيى شىعاتىن جاستارعا ۇلكەن ساباق! تانىمايتىن ادامنان #پاكەت الماق تۇگىلى ، سويلەسپەي، جانىڭا جولاتپاۋ كەرەك، - دەپ جازدى ءانشى.
سونداي-اق ونەر يەسى جاقىندا ادۆوكات سۇڭقار نۇرماعانبەتوۆتىڭ اقجارقىننىڭ اناسىنا جازعان حاتتارىنىڭ ءبىرىن جاريالاعانىن اتاپ ءوتتى.
- جاقىندا جاناشىر قازاقتىڭ ءبىر مىقتى پەرزەنتى ادۆوكات @sunkar_nurmagambetov اقجارقىننىڭ اناسىنا جازعان حاتىن جاريالادى. سىزدەر دە وقىڭىزدار… ”قۇرمەتتى اناشىم! مەنىڭ وتباسىم تۋرالى قانشالىقتى ارماندايتىنىمدى بىلەسىز: اسىرەسە بالا كەزىمدى مەن ءبارىن قاتتى ساعىندىم. ءبىزدىڭ جۇرەگىمىز ءبىر-بىرىمەن تىعىز بايلانىستى ەكەنىن بىلەسىز. ءبىز ءالى دە جاقىنبىز. مەن ءبىزدىڭ وتباسىمىزدىڭ ءاربىر مۇشەسىن ساعىندىم جانە جاقسى كورەمىن. سىزدەن كوبىرەك حاتتار مەن فوتولار كۇتەمىن. ماحابباتپەن، قىزىڭىز اقجارقىن…. “ قىسقا حات بولعانىمەن ( تسەنزۋرا مىقتى قىتايدا) - ساعىنىشقا ، وكسىككە تولى… اناسىنا سابىر بەرسىن، جاراتقان يەم….مەن اقجارقىننىڭ ەش كىناسىز ەكەنىنە كامىل سەنەمىن. قازاققا ءتان اڭقاۋلىقپەن، البىرت جاستىق شاقتىڭ سالدىر- سالاقتىعىمەن ، ويلانباي جاساعان ءبىر قادامى ءۇشىن، ءومىرى زايا كەتپەسە ەكەن! تىم بولماسا ، ەلگە ورالسا ەكەن! پرەزيدەنتىمىز قاسىم- جومارت توقاەۆ تىزگىندى الا سالا، اقجارقىننىڭ ماسەلەسىن كوتەرگەن ەدى. ناتيجەسى بولسىن دەپ تىلەيىكشى… اعايىن، دۇعادا بولايىق، جازايىق، ماسەلەنى كوتەرەيىك!، - دەپ جازدى مەرۋەرت تۇسىپباەۆا.
ەستەرىڭىزگە سالا كەتەيىك، قازاقستاندىق اقجارقىن تۇرلىباي 2014 جىلى ناۋرىزدا گۋانجوۋ اۋەجايىندا ۇستالعان ەدى. كەيىن ونى ءومىر بويىنا باس بوستاندىعىنان ايىرعان بولاتىن.
"ادىرنا" ۇلتتىق پورتالى
