Ánshi Merýert Túsipbaeva túsinde Qytaıda ómir boıyna túrmege qamalǵan Aqjarqyn Turlybaıdy kóripti. Bul týraly ol óziniń Instagram-paraqshasynda arnaıy jazba jarııalap, bılikke úndeý jasady, dep habarlaıdy "Adyrna" ulttyq portaly.
- Búgin túsimde Aqjarqyn Turlybaıdy kórippin…. Eshqashan kórmegen, tildespegen adam nege túsińe enedi eken?! Bálkim , kóp oılaǵannan shyǵar…. Qarshadaı qazaqtyń qyzy, taǵdyrdyń tálkegimen qaıta kelmes jastyq shaǵyn, tar qapasta, dini de, tili de bizge jat, ózge elde ótkizýde. Óz basym, Aqjarqyn týraly tyń málimet paıda bolsa, eleń etemin. Bas bostandyǵynan aıyrylyp, #pojıznennoezaklıýchenıe qudaı bergen bar ǵumyryn bodanda ótkizýden asqan qasiret bar ma adam balasyna? Onyń ústine, názik qyz balaǵa…. Bul oqıǵa, shetelge jıi shyǵatyn jastarǵa úlken sabaq! Tanymaıtyn adamnan #paket almaq túgili , sóılespeı, janyńa jolatpaý kerek, - dep jazdy ánshi.
Sondaı-aq óner ıesi jaqynda advokat Suńqar Nurmaǵanbetovtiń Aqjarqynnyń anasyna jazǵan hattarynyń birin jarııalaǵanyn atap ótti.
- Jaqynda janashyr qazaqtyń bir myqty perzenti advokat @sunkar_nurmagambetov Aqjarqynnyń anasyna jazǵan hatyn jarııalady. Sizder de oqyńyzdar… ”Qurmetti anashym! Meniń otbasym týraly qanshalyqty armandaıtynymdy bilesiz: ásirese bala kezimdi men bárin qatty saǵyndym. Bizdiń júregimiz bir-birimen tyǵyz baılanysty ekenin bilesiz. Biz áli de jaqynbyz. Men bizdiń otbasymyzdyń árbir múshesin saǵyndym jáne jaqsy kóremin. Sizden kóbirek hattar men fotolar kútemin. Mahabbatpen, qyzyńyz Aqjarqyn…. “ Qysqa hat bolǵanymen ( enzýra myqty Qytaıda) - saǵynyshqa , óksikke toly… Anasyna sabyr bersin, jaratqan ıem….MEN Aqjarqynnyń esh kinásiz ekenine kámil senemin. Qazaqqa tán ańqaýlyqpen, albyrt jastyq shaqtyń saldyr- salaqtyǵymen , oılanbaı jasaǵan bir qadamy úshin, ómiri zaıa ketpese eken! Tym bolmasa , elge oralsa eken! Prezıdentimiz Qasym- Jomart Toqaev tizgindi ala sala, Aqjarqynnyń máselesin kótergen edi. Nátıjesi bolsyn dep tileıikshi… Aǵaıyn, duǵada bolaıyq, jazaıyq, máseleni kótereıik!, - dep jazdy Merýert Túsipbaeva.
Esterińizge sala keteıik, qazaqstandyq Aqjarqyn Turlybaı 2014 jyly naýryzda Gýanjoý áýejaıynda ustalǵan edi. Keıin ony ómir boıyna bas bostandyǵynan aıyrǵan bolatyn.
"Adyrna" ulttyq portaly
