شىمكەنت قالاسى اكىمىنىڭ ورىنباسارى ەرعالي بىلىسبەكوۆ تۇرعىنداردى جەكە ماسەلەلەرى بويىنشا قابىلداۋىنان كەيىن «تۇران-2» شاعىن اۋدانىنداعى الەۋمەتتىك وسال توپتاعى ازاماتتارعا قاراستىرىلعان تۇرعىن ۇيلەردى ارالادى. قابىلداۋدا بولعان سالتانات ەسبوسىنوۆانىڭ ءوتىنىشى بويىنشا جاڭا باسپانالاردىڭ مۇمكىندىگى شەكتەۋلى ازاماتتارعا ىڭعايلىلىعىن تەكسەردى.
قالا تۇرعىنى 2012 جىلى 1-2 توپ ساناتى بويىنشا تۇرعىن ءۇي كەزەگىنە تىركەلگەن. بۇگىندە جاڭادان بوي كوتەرگەن تۇرعىن ءۇيدىڭ ءبىرىنشى قاباتىنان 1 بولمەلى پاتەرمەن قامتاماسىز ەتىلىپ وتىر. الايدا، جۋىناتىن بولمە ەسىگىنىڭ تارلىعىنا نارازى. ايتۋىنشا، مۇگەدەكتەر ارباسىنىڭ كولەمى ەسكەرىلمەگەن. قالا اكىمىنىڭ ورىنباسارى بۇل كەمشىلىك بويىنشا قالالىق قۇرىلىس باسقارماسى مەن مەردىگەر كومپانيا وكىلدەرىنە قاتاڭ ەسكەرتۋ جاساپ، پاتەردى وسى ازاماتتاردىڭ ىڭعايلىعىنا ساي تۇزەۋگە ۋاقىت بەردى.
-بولاشاقتا ەشكىمنىڭ ومىرىنە نەمەسە دەنساۋلىعىنا كەپىل جوق. سول سەبەپتى ءۇيدى وزدەرىڭە ارناعانداي سالۋ قاجەت. تاياۋ ۋاقىت ىشىندە بۇل كەمشىلىكتى جويىپ، ىڭعايلى پاتەرمەن قامتاماسىز ەتۋىمىز كەرەك. تۇپتەپ كەلگەندە تاپسىرىلعان نىساننىڭ كەپىلدىك مەرزىمى دە وتپەگەن، - دەدى ەرعالي بىلىسبەكوۆ.
سونداي-اق، قالا باسشىسىنىڭ ورىنباسارى تۇرعىن ۇيلەردەگى پاندۋستار مەن اۋلالاردىڭ اباتتاندىرىلۋىن باقىلادى. ايتۋىنشا، جاڭا باسپانالاردىڭ جوبالاۋ قۇجاتىندا مۇمكىندىگى شەكتەۋلى ازاماتتاردىڭ تالابى قاتاڭ ەسكەرىلىپ، پاتەرلەر تەك تومەنگى قاباتتارىنان ۇلەستىرىلۋى ءتيىس. الداعى ۋاقىتتا «تۇران-2» شاعىن اۋدانىنان الەۋمەتتىك وسال توپتاعى ازاماتتارعا ارەندالىق ۇيمەن قامتۋ ماقساتىندا تاعى 9 ءۇي قالا مەنشىگىنە وتكەلى وتىر.
شىمكەنت قالاسى اكىمدىگىنىڭ ءباسپاسوز قىزمەتى
