الماتى وبلىسىنىڭ تۇرعىنى ءۇيىن ومىردە قيىن جاعدايعا تاپ بولعان ادامدارعا ارنالعان باسپاناعا اينالدىردى. بۇگىندە سەگىز زەينەتكەر مەن مۇگەدەك سانيام مۇحامەدسادىقوۆامەن ءبىر شاڭىراق استىندا ۇلكەن ءارى تاتۋ وتباسى رەتىندە بىرگە تۇرادى. بۇل تۋرالى “الماتى” تەلەارناسىنىڭ سيۋجەتىندە ايتىلعان.
وسى ۇيدە تۇراتىنداردىڭ ءبىرى - زەينەتكەر ولگا بەسپالوۆا. ول ۇلىمەن اراداعى كەلىسپەۋشىلىكتەردەن شارشاپ، ءوز ۇيىنەن كەتىپ قالعان.
"ۇيىمدە ولارعا ۇنەمى "كەدەرگى" كەلتىردىم. اس ۇيگە بارسام، "بىلاي تۇر، دۇرىس ىستەپ جاتقان جوقسىڭ" دەيدى. بولمەمە بارىپ، جىلايتىنمىن. مۇندا ءبارى جاقسى. وتە جىلى، وتە جاقسى، ولار مەنى قۇرمەتتەيدى، جاقسى كورەدى. سونيا - كەرەمەت ادام، مەن ول جاساعان نارسەنى ىستەي الماس ەدىم", - دەيدى ىلە اۋدانىنىڭ تۇرعىنى.
زەينەتكەر الەكساندر نەۆوروتوۆ سەگىز جىل بۇرىن قانت ديابەتىنە بايلانىستى اياعىنان ايىرىلعان. ءتورت جىلدان كەيىن ەكىنشىسىن كەستىرگەن. كەيىن ايەلى مەن ۇلىنىڭ قازاسى وعان اۋىر سوققى بوپ تيگەن.
"قالىپتى ءومىر سۇرەمىز، ەشقاشان جانجال شىعارمايمىز. 7 اقپاندا تۇنگى ساعات 12-دە وسىندا، تولەباەۆ كوشەسىنە كەلدىم. ولار مەنىڭ وتباسىم ەكەنىنە وتە قۋانىشتىمىن", - دەدى ول.
س.مۇحامەدسادىقوۆانىڭ قايىرىمدىلىق ىستەرى التى جىل بۇرىن باستالعان. ول ساياباقتا كۇنى بويى ورىندىققا وتىرعان اتانى بايقاعان. ءسويتىپ، ونىڭ جانىنان جاي عانا ءوتىپ كەتە الماي، زەينەتكەردى ۇيىنە الىپ كەتكەن. اتامەن ءتورت جىل بىرگە تۇرعان. ول اتا كەيىن ۇيلەنگەن، بىراق ءالى كۇنگە دەيىن سانياممەن بايلانىسىن ۇزبەگەن. وسى جىلدار ىشىندە ايەل 15 ادامدى قامقورلىعىنا العان. قازىر سەگىز ادام ءبىر شاڭىراق استىندا تۇرادى.
ء"بىز ينتەرناتتا تۇردىق. مۇعالىمدەر مەن تاربيەشىلەر مۇمكىندىگىڭ بولسا، باسقالارعا كومەكتەس دەپ ۇيرەتتى. جاعدايىڭ جەتسە، تاماقتاندىر، قامقورلىعىڭا ال. ارينە، 80 شارشى مەتر ءۇي 180 شارشى مەتر ۇيدەي بولمايدى. بىراق تار ۇيدە تاتۋ-ءتاتتى ءومىر ءسۇرىپ جاتىرمىز", - دەيدى س.مۇحامەدسادىقوۆا.
ايەلدىڭ ايتۋىنشا، كۇيەۋى زەينەتكەرلەر مەن مۇگەدەكتەرگە قامقورلىق جاساۋعا كومەكتەسەدى. ول جۇبايىمەن بىرگە ەكى ۇل تاربيەلەپ وتىر. ۇلدارىنىڭ بويىنا جاناشىرلىق پەن مەيىرىمدىلىك سەكىلدى ىزگى قاسيەتتەردى دارىتىپ جاتىر.
سانيامنىڭ ەسىگى بارلىق مۇقتاج جانعا اشىق. ولار جۇبايىمەن بىرگە قيىن جاعدايعا تاپ بولعاندارعا ارنالعان ورتالىق اشقىسى كەلەدى. قازىر ونىڭ قۇرىلىسى ءجۇرىپ جاتىر.
كەز كەلگەن ادام رەكۆيزيتتەرگە اقشا جىبەرىپ، قۇرىلىسقا كومەكتەسە الادى. ولار بيلىكتەن كومەك سۇراعىسى كەلمەيدى. جالعىز وتىنىشتەرى - ىلە اۋدانى مەرەي ساياجايىنداعى جولداردىڭ جوندەلۋى.
“ادىرنا” ۇلتتىق پورتالى
