قورعانىس ءمينيسترىنىڭ ورىنباسارى قانىش اۋباكىروۆ ءماجىلىس كۋلۋارىندا اسكەردەگى قاۋىپسىزدىكتى كۇشەيتۋ باعىتىندا قانداي جۇمىستار جۇرگىزىلىپ جاتقانىن مالىمدەدى، دەپ حابارلايدى «ادىرنا» ءتىلشىسى.
ايتۋىنشا، قازىرگى تاڭدا كازارمالارعا بەينەكامەرالار ورناتىلىپ جاتىر.
«سوڭعى ۋاقىتتا بولعان قۇقىقبۇزۋشىلىقتارعا بايلانىستى ۇلكەن جۇمىس جۇرگىزىپ جاتىرمىز. سونىڭ ءبىرى – كازارمالاردى تولىق بەينەباقىلاۋمەن قامتۋ. قازىر بۇل شارا بارلىق جەردە جۇزەگە اسىرىلۋدا. بۇدان بولەك، پسيحولوگتارمەن جۇمىس كۇشەيتىلدى»، – دەدى ۆيتسە-مينيستر.
اۋباكىروۆ اسكەردەن قورقۋدىڭ قاجەتى جوق ەكەنىن اتاپ ءوتتى.
«كوپشىلىككە اسكەر قورقىنىشتى بولىپ كورىنەدى، جاستار وزدەرىنىڭ جايلى جەرىنەن شىققىسى كەلمەيدى. بىراق مەن كوپتەگەن مىسال كەلتىرە الامىن. جاس جىگىت اسكەرگە العاشىندا قورقىپ كەلەدى، كەيىن ۇيرەنىپ، ءتىپتى ارى قاراي قىزمەتىن جالعاستىرادى، اسكەري وقۋ ورىندارىنا ءتۇسىپ، وفيتسەر اتانىپ جاتادى. وسىنداي جاقسى مىسالدار وتە كوپ»، – دەدى ول.
