بۇگىن قالا اكىمى مۇرات ايتەنوۆ جەكە مەنشىك ءبىلىم وشاقتارىنىڭ تالاپقا ساي بولۋىن قاداعالاۋ ماقساتىندا اسار شاعىن اۋدانىندا ينۆەستوردىڭ ەسەبىنەن سالىنىپ جاتقان 500 ورىندىق مەكتەپتىڭ قۇرىلىسىمەن تانىستى. بۇل مەكتەپكە جان باسىنا قارجىلاندىرۋ ارقىلى مەملەكەت ءار وقۋشى ءۇشىن قارجى تولەيتىن بولادى.
اكىم ءبىلىم مەكەمەسىن ارالاۋ بارىسىندا بالالاردىڭ ءبىلىم الۋىنا بارلىق جاعدايدىڭ جاسالۋىن، ماتەريالدىق بازالاردىڭ تالاپتارعا ساي بولۋىن قاداعالاپ، جەكە مەنشىك ءبىلىم ۇيىمدارى وقۋشىلارعا ينتەللەكتۋالدىق، فيزيكالىق جانە پسيحولوگيالىق، ادەبي-ەستەتيكالىق باعىتتا قوسىمشا ءبىلىم بەرەتىن، ماتەريالدىق-تەحنيكالىق جاعىنان تولىقتاي جابدىقتالعان زاماناۋي مەكتەپ بولۋ كەرەك ەكەنىن ەسكەرتتى.
جان باسىنا قارجىلاندىرۋ كولەمى اياسىندا مەكتەپتەردە وقۋ جانە ماتەريالدىق-تەحنيكالىق بازانى ءىشىنارا نىعايتۋ مۇمكىندىگى پايدا بولدى. سپورت قۇرال-جابدىقتارى، وقۋشى جيھازدارى، وقۋ تاقتالارى، كورنەكى قۇرالدار مەن وقۋ ماتەريالدارى، مۋزىكالىق اسپاپتار ساتىپ الىندى.
شىمكەنت قالاسى اكىمدىگىنىڭ ءباسپاسوز قىزمەتى
