لەڭگىر تۇرعىنى 75 ميلليون تەڭگە قارىز الىپ قۇمار ويىنعا تىككەن. بۇل تۋرالى tengrinews.kzكە سىلتەمە جاساپ "ادىرنا" ۇلتتىق پورتالى حابارلايدى.
تولە بي اپب-عا لەڭگىر قالاسىنىڭ تۇرعىنى ارىزداندى. ونىڭ ايتۋىنشا 30 جاستاعى ۇلى ۇيىنەن بەلگىسىز باعىتقا شىعىپ، قايتا ورالماعان. سونداي-اق اناسىنىڭ ءوز بالاسىن ىزدەپ جۇرگەنىنە ءتورت تاۋلىك بولعان. الايدا ىزدەۋ جۇمىستارىنان ناتيجە شىقپاعان سوڭ، پوليتسەيلەرگە حابارلاسقان.
تولە بي اپب قىزمەتكەرلەرى حابارلاما تۇسە سالىسىمەن تەز ارادا ارەكەت ەتىپ، وقيعا ورنىنا جەتتى. جوعالعان ەر-ازاماتتى تابۋ ماقساتىندا قاجەتتى دەپ تانىلعان بارلىق جەدەل-ىزدەستىرۋ جۇمىستارىن جوسپارلى تۇردە جۇرگىزدى. قالا كوشەلەرىن تەكسەرىپ، فوتوسۋرەتىن كورسەتۋ ارقىلى تۇرعىندار اراسىندا سۇراستىرۋ جۇمىستارىن جاسادى. رەسپۋبليكا كولەمىندە ءتارتىپ ساقشىلارىنا باعىتتامالار جولدانىپ، جوعالعان جىگىتتىڭ ايرىقشا بەلگىلەرى حابارلاندى. جاقىندارى مەن تۋىستارى، تانىستارى مەن بارۋى مۇمكىن جەرلەر مۇقيات تەكسەرىلدى. ىزدەۋ جۇمىستارىنا جەرگىلىكتى پوليتسيا قىزمەتىنىڭ ۋچاسكەلىك پوليتسيا، جەدەل ۋاكىلدەر مەن پاترۋلدىك پوليتسەيلەر جۇمىلدىرىلدى.
وسىلايشا، ىزدەۋ جۇمىستارىنا ءبىر اپتا ۋاقىت جۇمسالدى. ناتيجەسىندە، تۇركىستان پوليتسەيلەرى جوعالعان جىگىتتى الماتى قالاسىندا جۇرگەن جەرىنەن تاپتى.
بەلگىلى بولعانداي، تابىلعان جىگىت ءوزىنىڭ تانىستارىنان 75 ميلليون تەڭگە قارىزعا اقشا الىپ، ونى قۇمار ويىنعا جۇمساپ جىبەرگەن. ول ءوز سوزىندە قارىزعا العان اقشالارىن قايتارا الماعاندىقتان، الماتى قالاسىنا قاشىپ كەتۋگە ءماجبۇر بولعانىن جەتكىزدى.
"ادىرنا" ۇلتتىق پورتالى
