نيۋ-يورك فەدەرالدى سوتى قازاقستان رەسپۋبليكاسىنىڭ نيۋ-يوركتەگى قارجىگەر دەنيەل چاپمەنگە جانە ونىڭ Argentem Creek ("چاپمەن") كومپانياسىنا قارسى مولدوۆالىق وليگارحتار اناتول مەن گابريەل ءستاتيدىڭ كەڭ اۋقىمدى الاياقتىق سحەمالارىنداعى ءرولى ءۇشىن، ونىڭ سوت ءىسىن قابىلداماۋ ارەكەتتەرىنە قاراماستان، جالعاسادى دەپ شەشتى، دەپ حابارلايدى "ادىرنا" ۇلتتىق پورتالى ادىلەت مينيسترلىگىنىڭ ءباسپاسوز قىزمەتىنە سىلتەمە جاساپ.
2022 جىلى 11 اقپاندا اقش وكرۋگتىك سوتى (نيۋ-يوركتىڭ وڭتۇستىك وكرۋگى) قابىلداعان شەشىمدەر:
- قازاقستاننىڭ چاپمەنگە قارسى تالاپتارىن نيۋ-يورك شتاتىنىڭ سوتىنا قايتارۋ تۋرالى ءوتىنىشىن قاناعاتتاندىردى;
- چاپمەننىڭ قازاقستان تالاپتارىن قابىلداماۋ تۋرالى ءوتىنىشىن تالاپ قويۋشىنىڭ تالاپ قويۋ قۇقىعىن ساقتاي وتىرىپ، قابىلدامادى;
- چاپمەننىڭ Outrider تالاپتارىن قاراستىرماۋ تۋرالى ءوتىنىشىن قابىلدامادى;
- چاپمەننىڭ Outrider تالاپتارىن حسپ-داعى تورەلىك تارتىپتە قاراۋدى ماجبۇرلەۋ تۋرالى ءوتىنىشىن قاناعاتتاندىردى.
"بۇل - قازاقستان ءۇشىن وتە ماڭىزدى جەڭىس. ول چاپمەنگە قارسى سوت ءىسىن جالعاستىرۋعا مۇمكىندىك بەرەدى. نيۋ-يوركتەگى تالاپ-ارىز بويىنشا، چاپمەن ءستاتيدىڭ الاياقتىعىن شامامەن 2012 جىلى انىقتاعان. الايدا وعان قارسى قۇقىقتىق شارالار قولدانۋدىڭ ورنىنا قازاقستاندى جانە باسقا دا تۇلعالاردى الداۋ ماقساتىندا ستاتيمەن زاڭسىز ءسوز بايلاسقان", - دەپ ءتۇسىندىردى مينيسترلىك وكىلى.
ۆەدومستۆو مالىمەتىنشە، ءستاتيدىڭ الاياقتىعى - انىقتالعان دەرەك. ول بريۋسسەل اپەللياتسيالىق سوتىنىڭ 2021 جىلعى قاراشاداعى شەشىمى بويىنشا راستالعان. وندا سوت ستاتي قازاقستانعا قارسى تورەلىك تالقىلاۋعا دەيىن، تالقىلاۋ بارىسىندا جانە ودان كەيىن دە الاياقتىق ارەكەتتەر جاسادى دەگەن قورىتىندىعا كەلدى.
جاقىندا تاعايىندالعان قازاقستان رەسپۋبليكاسىنىڭ ادىلەت ءمينيسترى قانات مۋسين بۇل شەشىمگە كەلەسىدەي تۇسىنىكتەمە بەردى:
«نيۋ-يورك سوتىنىڭ بۇگىنگى شەشىمى قازاقستاننىڭ سىبايلاس جەمقورلىققا قارسى جانە ستاتي مەن ونىڭ سىبايلاستارىن جاۋاپكەرشىلىككە تارتۋ جونىندەگى جالعاسىپ جاتقان ارەكەتتەرىندەگى قۋانتارلىق وقيعا بولىپ تابىلادى. ەندى چاپمەننىڭ ستاتي الاياقتىعىنا قاتىسقاندىعى اقش سوتىندا تولىعىمەن اشىلاتىن بولادى».
بۇل شەشىمگە قازىر قازاقستان پرەمەر-ءمينيسترىنىڭ كەڭەسشىسى بولىپ تابىلاتىن بۇرىنعى ادىلەت ءمينيسترى مارات بەكەتاەۆ كەلەسىدەي تۇسىنىكتەمە بەردى:
«سوڭعى ەكى جىل ىشىندە چاپمەن امەريكاندىق سوتتاردىڭ قازاقستان (جانە Outrider كومپانياسى) بەرگەن تالاپ-ارىزدارىن ءمانى بويىنشا قاراۋىن توقتاتۋعا جانە/نەمەسە كەيىنگە قالدىرۋعا بارىنشا تىرىستى. ءبىز امەريكاندىق سوتتاردىڭ - الدىمەن ۆاشينگتوندا، ال قازىر نيۋ – يوركتە – بۇل ارەكەتتەردى قابىلداماعانىنا جانە ەندى سوت ءبىزدىڭ تالاپتاردى ودان ءارى قارايتىنىنا قۋانىشتىمىز».
"ادىرنا" ۇلتتىق پورتالى
