بيىل قاڭتار ايىندا الماتىداعى پوليتسيادا ازاپتالعانىن مالىمدەگەن تانىمال قىرعىز مۋزىكاندى ۆيكرام رۋزاحۋنوۆ 14 اقپاندا ۆيدەوۇندەۋ جاريالادى. الەۋمەتتىك جەلىلەردە تارالعان ۆيدەودا ول ادىلەت ءۇشىن كۇرەسەتىنىن ايتتى، دەپ حابارلايدى ورتالىق ازيانىڭ جاڭالىقتار قىزمەتى. بۇل تۋرالى "ادىرنا" ۇلتتىق پورتالى ulysmedia.kz-سىلتەمە جاساپ جازادى.
"ۇزاق ويلاندىم. مۋزىكا مەن كاسىپكە ەشتەڭە بولماعانداي ورالا المايتىنىمدى ءتۇسىندىم. تمد ەلدەرىندەگى دەموكراتيانى دامىتۋعا، ادام قۇقىقتارىنا قاتىستى جاعدايدى جاقسارتۋعا ۇلەس قوسقىم كەلەدى", - دەدى ول.
رۋزاحۋنوۆقا قىرعىز زاڭگەرلەرى كومەكتەسەدى. مۋزىكانتتىڭ ازىرگە ناقتى قاي ورگانعا ارىزداناتىنى بەلگىسىز. 10 اقپاندا ول قازاقستانداعى پوليتسيا كۇشتەرى ونى ازاپتاعانىن ايتقان.
رۋزاحۋنوۆتىڭ مالىمدەۋىنشە، ول بىلتىر جەلتوقساننىڭ اياعىندا الماتىعا كەلىپ، 7 قاڭتاردا ەلىنە قايتىپ بارا جاتقان ۋاقىتتا ۇستالعان. ونىڭ قۇجاتتارىن، بانك كارتالارىن، اقشاسىن تارتىپ العان. ءۇش كۇن قاماۋدا بولعان قىرعىز مۋزىكانتى 10 قاڭتاردا قىرعىزستانعا قايتارىلدى. بەت-اۋزى كوگەرگەن، ميى شايقالعان، قابىرعالارى سىنعان رۋزاحۋنوۆ بىشكەككە جەتكەن بەتتە اۋرۋحاناعا ءتۇستى.
قازاقستانداعى قاڭتار وقيعاسى كەزىندە ەكى قىرعىز ازاماتى قازا تاپقانى ءمالىم بولدى. ونعا جۋىق قىرعىزستاندىق قاماۋدان بوساتىلدى. مالىمەتتەرگە قاراعاندا، قاڭتار وقيعاسىنا بايلانىستى ۇستالعان ءبىر قىرعىز ازاماتى تاراز قالاسىندا قاماۋدا وتىر.
"ادىرنا" ۇلتتىق پورتالى
