جازۋشى اقبەرەن ەلگەزەك كىتاپحانالارداعى قازاق تىلىندەگى كىتاپتار ۇلەسىنىڭ ازدىعىنا الاڭداۋشىلىق ءبىلدىردى. وسى ورايدا ول قولدانىستاعى زاڭناماعا ارنايى وزگەرىستەر مەن تۇزەتۋلەر ەنگىزۋدى ۇسىندى. بۇل تۋرالى Informburo.kz-كە سىلتەمە جاساپ، "ادىرنا" ۇلتتىق پورتالى حابارلايدى.
"قازىر قوعامدىق ماڭىزى بار دەگەن اتاۋمەن كىم كورىنگەننىڭ كىتابى شىعىپ، ەشكىم بارمايتىن كىتاپحانالارعا توعىتىلىپ جاتىر. جىل سايىن! ال مەكتەپ كىتاپحانالارىنا بۇل كىتاپتار جەتپەيدى. ارينە، بۇلار ەكى بولەك سالا ەكەنىن تۇسىنەمىن. بىراق، مەملەكەت بىرەۋ عوي. ءبىلىم جانە عىلىم مينيسترلىگىمەن بىرلەسە وتىرىپ بۇل ماسەلەنى شەشۋگە بولادى دەپ ويلايمىن", – دەدى اقبەرەن ەلگەزەك.
سونداي-اق، جازۋشى كىتاپحانالاردا قازاق تىلىندەگى كىتاپتار ۇلەسىنىڭ تىم از ەكەنىنە توقتالدى. ونىڭ دەرەگىنشە، قازىر مەكتەپ كىتاپحانالارىنداعى قازاق تىلىندە شىققان كىتاپتارىنىڭ جالپى ۇلەسى – 27 پايىز عانا.
"قالعان 73 پايىزى دەمەك ورىس تىلىندە بولعانى عوي. 30 جىل بويى شىعىپ كەلگەن كوركەم ادەبيەت ول مەكتەپتەرگە جەتپەگەن. سورەلەرىندە ءالى سول سوتسياليستىك رەاليزم تالابىمەن شىققان ەسكى يدەولوگيانى ناسيحاتتايتىن كىتاپتار تۇر. بۇل تۋرالى ارنايى رەسپۋبليكالىق كىتاپحاناشىلار سەمينارىندا ايتىلعان. ويىمنان شىعارىپ تۇرعان جوقپىن", – دەدى جازۋشى.
"ادىرنا" ۇلتتىق پورتالى
