شاحانوۆتىڭ قازاق حالقىنىڭ ايگىلى تۇلعالارىنا ءتىل تيگىزىپ، ولارعا قاتىستى ءتۇرلى مالىمدەمە جاساۋىنا قارسى شىققان نارازى قازاقستان جازۋشىلار وداعىنا جينالدى. ولار "داڭقتى اقىنداردىڭ ارۋاعىنا تاس اتىپ، رۋحىن، جىرىن قورلاۋعا" جول بەرمەيتىندەرىن مالىمدەپ، شاحانوۆتىڭ وداقتان شىعارىلۋىن تالاپ ەتتى دەپ حابارلايدى "جاس الاش" گازەتى.
وسىدان بىرنەشە كۇن بۇرىن مۇحتار شاحانوۆتىڭ ءوز ولەڭىندە، ىزىنشە جاساعان مالىمدەمەسىندە جامبىلعا، مۇحتار اۋەزوۆكە، ءسابيت مۇقانوۆقا، مۇقاعالي ماقاتاەۆقا قاتىستى داۋلى پىكىر ايتقان. بۇل پىكىر الەۋمەتتىك جەلىلەر مەن باق-دا كوپ تالقىلانىپ، نارازىلىق تۋدىرعان. ەندى بۇگىن جىر الىبى اتانعان اقىننىڭ ۇرپاقتارى ارنايى تالاپ قويىپ وتىر.
نارازى توپ جازۋشىلار وداعى باسقارما توراعاسى ۇلىقبەك ەسداۋلەتتىڭ اتىنا جازعان ءوتىنىش حاتقا 560 ادام قول قويعان. حاتتا:
«قۇرمەتتى ۇلىقبەك مىرزا!
ءبىزدىڭ سىزدەن وتىنەرىمىز:
جامبىل 1936 جىلدان جازۋشىلار وداعىنىڭ مۇشەسى، ونى قارالاعان اۋىر قىلمىستىق جالا جاپقان م.شاحانوۆتىڭ ماسەلەسى قارالىپ، ونى جازۋشىلار وداعى مۇشەسىنەن شىعارۋدى سۇرايمىز.
م. شاحانوۆتى وسىنداي اۋىر قىلمىسى ءۇشىن جازۋشىلار وداعى باسقارماسى سوتقا شاعىم ءتۇسىرىپ، ءادىل باعاسىن بەرىپ، جامبىلداي ۇلى اقىندى قولداپ، قورعاپ قالۋدى وتىنەمىز»، دەلىنگەن.
ال قازاق زيالى قاۋىم وكىلدەرىنىڭ ءبىرى ناعاشىبەك قاپالبەكۇلىنىڭ ايتۋىنشا، شاحانوۆ جامبىلدىڭ 1501 جىلدىق مەرەيتويى كەزىندە اقىندى اۋزىنان تاستاماي ماقتاۋمەن بولعان.
"1995 جىلى جامبىلدىڭ 150 جىلدىعى قارساڭىندا قىرعىزستانعا باردىق. سوندا قىرعىز زيالى قاۋىمىمەن باس قوسىپ، دوڭگەلەك ۇستەل وتكىزدىك. مۇحتار شاحانوۆ سوندا 3 كۇن بويى جامبىلدى اۋزىنان تاستاماي ماقتاۋمەن بولدى. ول كەزدە قىزمەتتە ءجۇردى عوي. سول كىسى سوڭعى كەزدەرى جامبىل اتامىزعا ءتىل تيگىزىپ، ونىڭ مۇراسىنا شابۋىل جاساۋدى باستادى. جامبىل عانا ەمەس، بىلەسىزدەر، قازاقتىڭ ءىرى-ءىرى تۇلعالارىن مانسۇقتاپ ولەڭ جازدى، اۋىر-اۋىر سوزدەر ايتتى.
سودان كەيىن «الماتى» تەلەارناسىنا تىكەلەي ەفيرگە شىقتى. ءبىز حالىقتان كەشىرىم سۇرايتىن شىعار دەپ كۇتكەنبىز. سويتسەك، كەرىسىنشە، الگى ايتقاندارىن ودان ارى ىندەتىپ، ارۋاقتى قورلادى. بۇعان ءبىر توقتاۋ بولۋ كەرەك قوي، سوندىقتان قازاق ادەبيەتىنىڭ قاسيەتتى قارا شاڭىراعىنا كەلىپ، ءوزىمىزدىڭ مالىمدەمەمىزدى بەردىك. 560 ادام قول قويدى، بىراق، بۇل ءتىزىم ءالدى دە وسە بەرەدى، ءالى دە قوسىلىپ جاتقان ادامدار بار، – دەيدى ناعاشىبەك قاپالبەكۇلى.
ال "شاپاعات-نۇر» جۋرنالىنىڭ باس رەداكتورى تالعات نۇرقاسىم:
قازىر عانا جيىننان شىقتىق. جازۋشىلار وداعىنىڭ باسشىلىعى ءبىر اپتانىڭ ىشىندە ءبىزدىڭ مالىمدەمەمىز بەن ءوتىنىش-تالاپتارىمىزدى ارنايى تالقىلاپ، ناقتى ءبىر شەشىمگە كەلەتىندەرىن ايتتى. ءبىزدىڭ باستى ماقساتىمىز قازاقتىڭ ۇلى تۇلعالارىن مانسۇقتاۋعا جول بەرمەۋ. قازاقتىڭ زيالى قواۋىمى وسىلاي ارۋاقتى قورلاپ، ءبولىنىپ الىپ، داۋلاسىپ جاتسا كۇنى ەرتەڭ قازاق دەگەن ۇلتتان نە تامتىق قالادى؟! ۇلت بولامىز دەسەك، كەيىنگى ۇرپاق اتا-بابالاسىنا توپىراق شاشپاۋى كەرەك، كەرىسىنشە ولاردىڭ مۇراسىن ناسيحاتتاپ، ۇرپاقتان ۇرپاققا پاش ەتىپ وتىرۋىمىز كەرەك، – دەيدى.
جازۋشىلار وداعى باسشىلىعى نارازى توپتىڭ وتىنىشتەرىن ارنايى قارايتىنىن، وسى اپتانىڭ ىشىندە ءبىر شەشىمگە كەلەتىندەرىن ايتتى.
