بۇگىن الماتى وبلىسىنىڭ اكىمى قانات بوزىمباەۆ پەن «AIRBA FF» جشس ديرەكتورلار كەڭەسىنىڭ توراعاسى، «تەحنودوم» كومپانياسىنىڭ نەگىزىن سالۋشى ەدۋارد كيم وسىنداي مەموراندۋمعا قول قويدى.
الداعى تاڭدا الماتى وبلىسىندا ا+ كلاستى اۆتوماتتاندىرىلعان، الاڭى 200 مىڭ شارشى مەتر بولاتىن قازاقستانداعى ءىرى لوگيستيكالىق حاب سالىنادى. سونىڭ ناتيجەسىندە وبلىسقا 200 ملن. اقش دوللارى كولەمىندە ينۆەستيتسيا تارتىلىپ، 1,5 مىڭ جۇمىس ورنى اشىلادى.
قول جەتكىزىلگەن كەلىسىمگە سايكەس ماڭىزدى ينۆەستيتسيالىق جوبا الداعى 5 جىلدا بىرنەشە كەزەڭمەن ىسكە اسىرىلادى. كەشەن ىلە اۋدانىندا ورنالاسپاق.
جالپى «AIRBA FF» جشس — تسيفرلىق تەحنولوگيالاردى توپتاستىرۋمەن قاتار قويما ينفراقۇرىلىمىن، كۋرەرلىك جەتكىزۋ قىزمەتىن، تاپسىرىسىن كليەنتتىڭ ءوزى بارىپ الاتىن پۋنكت رەتىندە دە ناقتى سەكتوردا جۇمىس ىستەيدى. بۇل – قويمالاۋ، ماگيسترالدى لوگيستيكا، كليەنتتەر پەن سەرىكتەستەرگە جەتكىزىپ بەرۋ ىسىمەن اينالىساتىن ەلىمىزدەگى تۇڭعىش وپەراتور.
- بۇل - بۇرىن الماتى وبلىسىندا بولماعان وتە تارتىمدى ءارى ماڭىزدى جوبا. زاماناۋي تسيفرلىق تەحنولوگيالاردى قولدانۋ ەرەكشەلىگىن ەسكەرسەك، ناعىز جاڭا داۋىرگە لايىق دەۋگە بولادى. بىرىنشىدەن، ءبىزدىڭ اگرارلىق سالاداعى شارۋاشىلىقتارىمىزدىڭ ءوز ءونىمىن وتكىزۋىنە جاعداي جاسايدى. ەلىمىزدىڭ اگروونەركاسىپتىك كەشەنىندەگى ءونىم كولەمىنىڭ 28-30%-ءىن الماتى وبلىسى وندىرەتىنىن ەسكەرسەك، بۇل - ءبىز ءۇشىن ۇلكەن مۇمكىندىك. - دەدى ق.بوزىمباەۆ.
