3 جەلتوقساندا قوناەۆ قالالىق مادەنيەت ۇيىندە الماتى وبلىسىنىڭ جاستارىنا ارنالعان «ەسىرتكىسىز ءومىر – مىقتىلاردىڭ تاڭداۋى» فورۋمى ءوتتى. ءىس-شارانىڭ نەگىزگى ماقساتى – سالاۋاتتى ءومىر سالتىن ناسيحاتتاۋ، جاستار اراسىندا ناشاقورلىقتىڭ الدىن الۋ جانە قۇقىقتىق مادەنيەتتى ارتتىرۋ.
فورۋم جۇمىسىنا الماتى وبلىسىنىڭ اكىمى مارات ەلەۋسىزۇلى سۇلتانعازيەۆ، وبلىستىق پوليتسيا دەپارتامەنتىنىڭ باستىعى، پوليتسيا پولكوۆنيگى مەيرام جۇمكەنۇلى ابىكەەۆ، سپورتشىلار، قوعام بەلسەندىلەرى، جاستار جانە تانىمال بلوگەرلەر. مودەراتور قىزمەتىن اكتەر، بلوگەر مارسەلەن كاماتە اتقاردى.
ءوز سوزىندە وبلىس اكىمى جاستاردىڭ قۇقىقتىق مادەنيەتى مەن جاۋاپكەرشىلىگىن قالىپتاستىرۋ قوعامنىڭ تۇراقتى دامۋى مەن قاۋىپسىزدىگى ءۇشىن ماڭىزدى ەكەنىن اتاپ ءوتتى. سونىمەن قاتار ول مەملەكەت باسشىسى قاسىم-جومارت توقاەۆتىڭ ەسىرتكى ساۋداسىنا جانە ناشاقورلىققا قارسى كۇرەس جونىندەگى تاپسىرمالارى اياسىندا وبلىستا اتقارىلىپ جاتقان جۇمىستارعا توقتالدى. اتاپ ايتقاندا، «پارىز ەرىكتىلەرى» قوعامدىق بىرلەستىگىنىڭ «ساقتان» جوباسى شەڭبەرىندە 1000-عا جۋىق زاڭسىز ەسىرتكى جارناماسى جويىلدى، 35 تاقىرىپتىق سەمينار ءوتىپ، جاستارعا 600-دەن استام اقپاراتتىق ماتەريال تاراتىلدى. سونىمەن قاتار 40 بەينەماتەريال جاريالانىپ، تىكەلەي ەفيرلەر، 100 اقپاراتتىق ءىس-شارا جانە 70-تەن استام تۇنگى رەيد ۇيىمداستىرىلدى.
پوليتسيا دەپارتامەنتىنىڭ باستىعى مەيرام ابىكەەۆ وڭىردە ەسىرتكى قىلمىسىنا قارسى ءىس-قيمىلدىڭ كۇشەيتىلگەنىن، سوڭعى جىلدارى تاركىلەنگەن سينتەتيكالىق ەسىرتكىنىڭ كولەمى ون ەسەگە ارتقانىن مالىمدەدى. جىل بويى بەس ەسىرتكى زەرتحاناسى انىقتالىپ، 10 توننادان استام ەسىرتكى زاتتارى تاركىلەندى. سونداي-اق دەپارتامەنت جانىنان پروفيلاكتيكالىق كەڭەس قۇرىلىپ، جاستارمەن، ءبىلىم بەرۋ ۇيىمدارىمەن جانە ۇكىمەتتىك ەمەس ۇيىمدارمەن تىعىز بايلانىستا جۇمىس جۇرگىزىلىپ جاتىر.
فورۋم بارىسىندا ناشاقورلىققا قارسى ءىس-شارالارعا بەلسەنە اتسالىسقان جاستار ماراپاتتالىپ، پروفيلاكتيكالىق كەڭەس قۇرامىنا جاڭا مۇشەلەر قابىلداندى. ماراپاتتالعانداردىڭ ءبىرى – زياندى ادەتتەرگە قارسى تۇسىرىلگەن فيلمگە قاتىسىپ، پوليتسيا قىزمەتكەرىنىڭ وبرازىن سومداعان بلوگەر ابزال عاريفۋللين.
شارا اياسىندا قر ءىىم كينولوگيالىق ورتالىعى قىزمەتتىك-ىزدەستىرۋ يتتەرىنىڭ قويىلىمىن كورسەتتى. فورۋمنىڭ سىرتقى بولىمىندە جەدەل ارەكەت ەتەتىن ارنايى جاساق جاۋىنگەرلەرى قويان-قولتىق ۇرىس تاسىلدەرىن جانە قارۋلى قىلمىسكەردى قۇرىقتاۋ بويىنشا جاتتىعۋلارىن كورسەتىپ، ارنايى تەحنيكامەن تانىستىردى.
ءىس-شارا جاستاردىڭ سالاۋاتتى ءومىر سالتىن ۇستانۋ، قاۋىپسىز ورتا قالىپتاستىرۋ جانە ەسىرتكىگە قارسى يممۋنيتەتىن نىعايتۋ باعىتىنداعى ماڭىزدى قادامداردىڭ ءبىرى بولىپ ءوتتى.
