قازاقستان پرەزيدەنتى قاسىم-جومارت توقاەۆ نۇرسۇلتان نازارباەۆتىڭ قىزمەتىنە ءادىل باعا بەرۋ كەرەك ەكەنىن ايتتى، - دەپ حابارلايدى “ادىرنا” ۇلتتىق پورتالى.
"ماسەلەگە جان-جاقتى قارايتىن بولساق، حالىق نارازىلىعىنىڭ استارىندا وتكىر الەۋمەتتىك ماسەلە جاتىر. حالىقتىڭ كوبىنىڭ الەۋمەتتىك جاعدايى تومەن. بۇل – اقيقات. مەملەكەتتىڭ تۇتاس بايلىعى از عانا توپتىڭ قولىندا. تەڭسىزدىك بەلەڭ الۋدا. نارازىلىقتىڭ ءتۇپ-تامىرى وسىدان باستالدى. بۇل ماسەلە تۋرالى مەن پارلامەنتتە، باسقا دا جيىنداردا ايتتىم.
وكىنىشتىسى، ازاماتتاردىڭ نارازىلىعىن لاڭكەستەر مەن قىلمىسكەرلەر پايدالانىپ كەتتى. بۇعان ءبارىمىز كۋا بولدىق. راسىندا، الەۋمەتتىك جەلىدە تۇڭعىش پرەزيدەنتىمىز تۋرالى ءارتۇرلى ويلار ايتىلىپ، جازىلىپ جاتىر. قانشا ادام بولسا، سونشا پىكىر بولادى", - دەدى توقاەۆ تەلەارناعا بەرگەن سۇحباتىندا.
توقاەۆ ەكس پرەزيدەنت نۇرسۇلتان ءابىشۇلى نازارباەۆتىڭ 30 جىل بويى ەل باسقارىپ، سىڭىرگەن ەڭبەگىن جوققا شىعارۋعا بولمايدى دەپ ويلايتىنىن ايتتى.
"تاريحقا قيانات جاساماۋ كەرەك. نۇرسۇلتان نازارباەۆ – مەملەكەتىمىزدىڭ ىرگەسىن قالاعان، مەملەكەتتىگىمىزدى نىعايتۋعا زور ۇلەس قوسقان تۇلعا. ونىڭ قىزمەتىنە ءادىل باعا بەرۋگە مىندەتتىمىز. تۇڭعىش پرەزيدەنتتىڭ كەمشىلىكتەرى بولسا، ودان جاس باسشىلار ساباق الۋى قاجەت. قاڭتار وقيعاسى ەلىمىزگە دە، مەنىڭ وزىمە دە ۇلكەن ساباق بولعانى ءسوزسىز. ءتيىستى قورىتىندى جاسالدى. قازىر ەلىمىزدە بولىپ جاتقان ساياسي شەشىمدەر − سونىڭ ناتيجەسى. الدىمىزدا وتە كوپ جۇمىس بار. مۇنى بارلىعى كورىپ، ءبىلىپ وتىر دەپ ويلايمىن", - دەدى پرەزيدەنت.
“ادىرنا” ۇلتتىق پورتالى
