قوستاناي وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى پەداگوگ-پسيحولوگقا قاتىستى قىلمىستىق ءىستى قارايدى. وعان بالالار ءۇيىنىڭ تاربيەلەنۋشىسىن زورلادى دەپ ايىپ تاعىلىپ وتىر دەپ جازدى turkystan.kz.
بەلگىلى بولعانداي، جابىرلەنۋشى رۋدنىيداعى بالالار ۇيىنەن شىققاننان كەيىن اراعا ەكى اپتا سالىپ، پوليتسياعا ارىز جازعان. توبولينفونىڭ حابارلاۋىنشا، قازىر جابىرلەنۋشى كوللەدجدە وقيدى.
«نە مولچي» قورىنىڭ جەتەكشىسى دينا ءتاڭسارىنىڭ ايتۋىنشا، ءجاسوسپىرىم قىز ەكى جىل بويى زورلىق-زومبىلىق كورگەن. ول مۇعالىمنىڭ دنق-سىن جيناۋ ارقىلى زورلاۋ فاكتىسىن دالەلدەي العان.
ەر ادامعا قر قىلمىستىق كودەكسىنىڭ 120-بابى («زورلاۋ») بويىنشا ايىپ تاعىلدى. پروتسەسس جابىق ەسىك جاعدايىندا وتەدى.
كۇدىكتى بالالار ۇيىندە 10 جىلدان استام ۋاقىت جۇمىس ىستەگەن. وعان دەيىن ول «قارا بۇركىت» ءومىر بويىنا باس بوستاندىعىنان ايىرۋ كولونياسىندا پسيحولوگ قىزمەتىن اتقارعان.
ەسكە سالا كەتسەك، 2021 جىلدىڭ تامىز ايىندا رۋدنىيدا بالالار ءۇيىنىڭ قىزمەتكەرى مەكەمەنىڭ كامەلەتكە تولماعان تاربيەلەنۋشىسىن زورلادى دەگەن كۇدىكپەن ۇستالعان بولاتىن.
“ادىرنا” ۇلتتىق پورتالى
