بۇگىن حالىقارالىق «الاش» ادەبي سىيلىعىنىڭ لاۋرەاتى، قازاقستاننىڭ ەڭبەك سىڭىرگەن قايراتكەرى ديداحمەت ءاشىمحانۇلىنىڭ ءۇش تومدىق شىعارمالار جيناعىنىڭ تۇساۋكەسەرى ءوتتى.
بۇل ۇشتومدىقتىڭ العاشقىسى «تاسقالا» دەپ اتالىپ، وعان قالامگەردىڭ پوۆەستەر مەن اڭگىمەلەر جيناعى ەنگەن. «اقشوقى» اتالعان ەكىنشى تومىنا اڭگىمەلەرى مەن ادەبي ەسسەلەرى جانە پۋبليتسيستيكالىق ماقالالارى ەنگىزىلگەن. ءۇشىنشى تومدىققا ءار جىلدارى اۋدارىلعان الەم ادەبيەتى كلاسسيكتەرى دجەك لوندوننىڭ «تەڭىز قورقاۋى» رومانى مەن «كۇمان» اڭگىمەسى جانە دجەك گولسۋورسيدىڭ «دەۆوندىق ادام» اتتى نوۆەللاسى كىرگەن.
شارادا ديداحمەت ءاشىمحانۇلىنىڭ ۇزەڭكىلەس دوستارى – نۇرداۋلەت اقىش، الىبەك اسقاروۆ، ناعاشىبەك قاپالبەكوۆ، قۋاندىق تۇمەنبايۇلى، ەركىن نۇرازحان، نۇرتورە جۇسىپتەر ديداعاڭنىڭ ازاماتتىعى مەن شىعارماشىلىعى تۋرالى كوپتەگەن ەستەلىكتەر ايتتى.
نۇرداۋلەت اقىش، جازۋشى:
- 70-ءشى جىلدارى ءبىزدىڭ قاتارىمىزداعى ءبىر توپ تالانتتى جاستار ادەبيەتكە ارالاسا باستادى. سولاردىڭ ىشىندە ديداحمەت ءاشىمحانۇلى ءوزىنىڭ جازۋ ستيلىمەن، ويىنىڭ ورنەكتى وبرازدىلىعىمەن كوزگە ەرەكشە ءتۇستى. ونىڭ ەرەكشەلىگى جايىندا مەن مىنانى ايتار ەدىم. بىرىنشىدەن، ول كىسى ويدى ءتۇيىپ ايتادى. ءاربىر شىعارماسىندا تاعىلىم بار. وي بار. ەكىنشىدەن، كوركەم ادەبيەتتىڭ وزەگى كوركەم ءتىل دەسەك، ديداحمەت ءاشىمحانۇلى سونى العاشقى تىرناقالدى تۋىندىسىنان-اق جەتە مەڭگەرگەن جازۋشى.
جاسۇلان ناۋرىزاليەۆ،
«ادىرنا» پورتالى
