عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم كوميتەتى ۇلتتىق بىرىڭعاي تەستىلەۋدى (ۇبت) جەتىلدىرۋ باعىتىندا اتقارىلىپ جاتقان جۇمىستار تۋرالى مالىمەت بەردى، دەپ حابارلايدى "ادىرنا" ۇلتتىق پورتالى.
ۆەدومستۆونىڭ مالىمەتىنشە، قازاقستاندىق ۇبت-نى ءادىسناماسى مەن ساپاسى جوعارى حالىقارالىق تەستىلەۋ جۇيەسىنە اينالدىرۋ ماقساتىندا ارنايى جۇمىس توبى قۇرىلعان. ونىڭ اياسىندا Educational Testing Service (ETS) حالىقارالىق تەستولوگيالىق كومپانياسىندا وقىتۋ ءۇشىن ازىرلەۋشىلەر مەن ساراپشىلاردىڭ ءتىزىمىن دايىنداۋ، ۇبت-نى كەزەڭ-كەزەڭىمەن جەتىلدىرۋگە ارنالعان بەس جىلدىق جوسپار ازىرلەۋ جانە ETS-پەن بىرلەسىپ تەست فورماتىن جاڭعىرتۋدىڭ ءادىسناماسىن جاساۋ كوزدەلىپ وتىر.
الايدا 2026 جىلى ۇبت فورماتىنا وزگەرىس ەنگىزۋ جوسپارلانباعان.
"بارلىق وزگەرىس عىلىمي تۇرعىدا زەردەلەنىپ، شەتەلدىك جانە وتاندىق تاجىريبەلى مامان-ساراپشىلاردىڭ قاتىسۋىمەن مۇقيات تالقىلانادى. ءبىلىمدى باعالاۋ جۇيەسىندەگى جاڭاشىلدىقتاردىڭ ماڭىزى مەن ناتيجەلەرى قوعامعا جان-جاقتى تۇسىندىرىلەتىن بولادى", – دەلىنگەن ۆەدومستۆونىڭ جاۋابىندا.
ەسكە سالايىق، بۇعان دەيىن قر عىلىم جانە جوعارى ءبىلىم مينيسترلىگى مەن ETS ءبىلىم بەرۋ جانە تالانتتاردى دامىتۋ سالاسىنداعى حالىقارالىق ۇيىمى ۇبت-نى ترانسفورماتسيالاۋعا باعىتتالعان ستراتەگيالىق ارىپتەستىكتى باستايتىنىن مالىمدەگەن ەدى.
