قوستاناي قالاسىنداعى م.كوبەەۆ اتىنداعى جالپى ءبىلىم بەرەتىن مەكتەپتىڭ وقۋشىسى جانەل تانسىقپاەۆا ناۋرىزداعى ۇلتتىق بىرىڭعاي تەستىلەۋدە جالپى 140 بالدان 139 بالل جينادى. بۇل تۋرالى وقۋ-اعارتۋ مينيسترلىگى مالىمدەدى، دەپ حابارلايدى "ادىرنا".
"جانەلدىڭ جوعارى جەتىستىگى كەزدەيسوقتىق ەمەس، باسقا تۇلەكتەرگە ۇلگى بولا الاتىن سانالى كوزقاراستىڭ جەمىسى، جۇيەلى دايىندىقتىڭ ناتيجەسى. شاكىرتتىڭ تابىسىنىڭ باستى فاكتورلارىنىڭ ءبىرى حالىقارالىق IELTS ەمتيحانىنا ساپالى دايىندىق بولدى", – دەپ جازدى مينيسترلىكتىڭ ءباسپاسوز قىزمەتى.
7.0 بالل العان سەرتيفيكات وعان بەيىندىك ءپان بويىنشا ەڭ جوعارى بالدى اۆتوماتتى تۇردە راستاۋعا مۇمكىندىك بەردى. بۇل ءتىل قۇزىرەتتىلىكتەرىن جالپى وقۋ باعدارلاماسىنا كىرىكتىرۋدىڭ ماڭىزدىلىعىن تاعى ءبىر رەت دالەلدەيدى.
كەز كەلگەن سالاعا جول اشاتىن ەڭ جوعارى ناتيجەگە قاراماستان، جانەل پەداگوگيكا ماماندىعىنا ءتۇسۋدى شەشىپتى.
"مەنىڭ ماقساتىم جاي عانا ءبىلىم بەرۋ ەمەس، بالالاردى شابىتتاندىرۋ. مەنى ءبىر كەزدە العاشقى مۇعالىمىم تورعىن يبراگيموۆا شابىتتاندىرعان ەدى", – دەپ اتاپ وتەدى تۇلەك.
جانەلدىڭ تاڭداۋى دارىندى جاستار اراسىندا پەداگوگ ماماندىعى بەدەلىنىڭ ارتىپ كەلە جاتقانىن كورسەتەدى. قازىر تۇلەك مەملەكەتتىك گرانتقا كونكۋرستا ءوز ناتيجەسىن راستاۋ ءۇشىن ۇبت-نىڭ نەگىزگى كەزەڭىنە دايىندالىپ جاتىر.
