مينيسترلىك مالىمەتىنشە، نەگىزگى ۇبت باستالعالى بەرى تالاپكەرلەر تەستىلەۋدەن شامامەن 292 مىڭ رەت وتكەن.
2026 جىلدىڭ 10 مامىرىندا باستالعان نەگىزگى ۇبت 292 مىڭعا جۋىق رەت تاپسىرىلدى.
- تالاپكەرلەردىڭ 72%-ى تەستىلەۋدى قازاق تىلىندە،
- 28%-ى ورىس تىلىندە
- 469 رەت اعىلشىن تىلىندە تاپسىردى.
التىنشى اپتانىڭ قورىتىندىسى بويىنشا تالاپكەرلەردىڭ 68%-ى شەكتى بالل جينادى. بەس ءپان بويىنشا ورتاشا بالل 64 بالدى قۇرادى. ەڭ جوعارى ناتيجە – 140 بالل، ونى پاۆلودار وبلىسىنىڭ تۇلەگى اسەت التاير جينادى.
ەرەكشە ءبىلىم بەرۋ قاجەتتىلىكتەرى (ەبق) بار وقۋعا تۇسۋشىلەر ءۇشىن قولايلى جاعداي جاساۋعا ەرەكشە كوڭىل بولىنەدى. ۇبت-عا ەبق بار 735 تالاپكەر قاتىستى.
تالاپكەرلەردىڭ تەست تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرۋ قۇقىعى بار. تەحنيكالىق سەبەپتەر بويىنشا اپەللياتسيا تىكەلەي تەستىلەۋ كەزىندە قابىلدانادى. ناتيجەلەرى بار سەرتيفيكاتتار اپەللياتسيا قاراستىرىلعاننان كەيىن جەكە كابينەتتەردە قولجەتىمدى بولادى.
ۇبت-نى وتكىزۋدىڭ التى اپتاسىندا 624 ەرەجە بۇزۋشىلىق انىقتالدى. 385 تالاپكەر سمارتفونداردى، سمارت كوزىلدىرىكتەردى، ميكرو قۇلاققاپتاردى، شپارگالكالاردى جانە باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 238 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلدى، ولاردىڭ ناتيجەلەرى جويىلدى. بەينەجازبالاردى تەكسەرۋدەن سوڭ ەرەجە بۇزعان 1 ادامنىڭ ناتيجەسى جويىلدى. وزگە ادامداردىڭ ورنىنا كىرۋ فاكتىلەرى انىقتالعان جوق.
2026 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى.
