بۇل پىكىرىمەن بەلگىلى مەملەكەت جانە قوعام قايراتكەرى Qasqa Jol Youtube ارناسىنا بەرگەن سۇحباتىندا ءبولىستى، دەپ حابارلايدى "ادىرنا" ۇلتتىق پورتالى. جۋرناليست اباي سەيفۋللا بايمەنوۆتەن «وپپوزيتسيا قاتارىندا ءبىراز جۇرگەنىڭىزبەن نازارباەۆ جۇيەسىنە قالتقىسىز، ادال قىزمەت ەتكەندەردىڭ ءبىرىسىز. وسى كۇنگە دەيىن، كىمگە سەنىم ارتقانىڭىز ءۇشىن، قاي شەشىمدەرىڭىز ءۇشىن وكىنەر ەدىڭىز؟» دەپ سۇراعان ەدى.
«مەن نازارباەۆ رەجيمىنە قالتقىسىز قىزمەت ەتكەندەردىڭ ىشىنە جاتپايمىن دەپ ويلايمىن. سەبەبى مەن ەكى رەت ءوز ەركىممەن بيىك لاۋازىمنان كەتتىم. 2001 جىلى مارقۇم التىنبەك سارسەنبايۇلى «ماعان قاۋىپ ءتونىپ تۇر» دەگەن كەزدە باردىم. سول كەزدە مەنى ابليازوۆپەن جانە باسقا ازاماتتارمەن ءوزى باسقاراتىن تيپوگرافيادا كەزدەستىردى. سوندا ولارعا قوسىلاتىنىمدى مالىمدەدىم. ەكىنشى رەت 2014 جىلى مەملەكەتتىك قىزمەت ىستەرى اگەنتتىگىنەن كەتكەنمىن. 2003 جىلى دا ەڭبەك مينيسترلىگىن باسقارۋدان باس تارتتىم»، - دەپ جاۋاپ بەرگەن بايمەنوۆ.
اليحان بايمەنوۆكە 2001 جىلى كۇزدە توقاەۆ تا قىزمەت ۇسىنعان ەكەن.
«ول كەزدە قاسىم-جومارت توقاەۆ پرەمەر-مينيستر. ماعان حابارلاسىپ «ءسىز نە ىستەپ ءجۇرسىز؟ مەن ءسىزدى ۆيتسە-پرەمەر بولۋعا دايىن دەپ پرەزيدەنتپەن كەلىسىپ ءجۇر ەدىم» دەدى. بىراق مەن دوستارىمنىڭ الدىنداعى ۋادەمنەن باس تارتا المايتىنىمدى ايتتىم»، - دەيدى قوعام قايراتكەرى.
سۇحبات بارىسىندا بايمەنوۆ نازارباەۆقا قاتىستى بىرنەشە رەت سىني پىكىر ءبىلدىردى.
«1995 جىلدان باستاپ تەجەگىش كۇشتەر بولماي نازارباەۆ پەندەلىككە بوي الدىرا باستادى. دەگەنمەن باستاپقى كەزەڭدەگى ەڭبەگىن ەشكىم جوققا شىعارا الماس. ال پەندەلىك قىزىقتارىنىڭ الدىندا ءوزىن ءوزى تەجەي الماۋى بۇرىنعى ەڭبەكتەرىنىڭ ءبىرازىن شايىپ كەتتى... مەملەكەت بايلىعىن ۇرلاعانداردى بىلە تۇرا كوز جۇما قارادى... جاساعان كەمشىلىك-قاتەلىكتەرى بولسا سول ءۇشىن اللادان كەشىرىم سۇراپ، قاراپايىم ادام رەتىندەگى ءومىرىن سۇرە بەرسىن»،- دەگەن پىكىرلەر ايتتى ساياساتكەر.
سۇحباتتىڭ تولىق نۇسقاسىن تومەندەگى سىلتەمە ارقىلى كورە الاسىزدار:
"ادىرنا" ۇلتتىق پورتالى
