شىمكەنت قالاسىندا وتكەن جىلى 1 ملن استام شارشى مەتر تۇرعىن ءۇي پايدالانۋعا بەرىلگەن. ونىڭ 571,7 مىڭ شارشى مەترى كوپقاباتتى ءۇي. ناتيجەسىندە يندەكاتور كورسەتكىشى 2020 جىلمەن سالىستىرعاندا 56 پايىزعا ۇلعايعان. بيىل 1 ملن 60 مىڭ شارشى مەتر ءۇيدى قولدانىسقا بەرۋ كوزدەلىپ وتىر.
بۇل تۋرالى قالا قۇرىلىسى باسقارماسىنىڭ باسشىسى ابىلسەيت راباەۆ قالا اكىمدىگىنىڭ «Instagram» پاراقشاسىنداعى تىكەلەي ەفيردە باياندادى.
باسقارما باسشىسى وتكەن جىلى اتقارىلعان جۇمىستارعا توقتالىپ، بيىلعى جوسپارلارمەن ءبولىستى.
2021 جىلى بيۋدجەت ەسەبىنەن 4 832 پاتەرلى 79 تۇرعىن ءۇيدىڭ قۇرىلىسى ەكى باعىتتا جۇرگىزىلگەن. ونىڭ 1 656 پاتەرلى 26 ءۇي ارەندالىق بولسا، 3 176 پاتەرلى 53 كوپقاباتتى ءۇي كرەديتتىك باعىتتا. جىل قورىتىندىسىمەن 1 860 كرەديتتىك پاتەر مەن ارەندالىق 336 پاتەر پايدالانۋعا بەرىلگەن.
–بيىل «نۇرلى جەر» باعدارلاماسى اياسىندا بيۋدجەت ەسەبىنەن 2 972 پاتەرلى 51 كوپقاباتتى تۇرعىن ءۇيدىڭ قۇرىلىسى جۇرۋدە. بۇل ۇيلەردىڭ 1 652 پاتەرى كرەديتتىك باعىتتا، 1 320 پاتەرى ارەندالىق. اتالعان ۇيلەردىڭ قۇرىلىسىن اعىمداعى جىلى اياقتاپ، پايدالانۋعا تاپسىرۋ جوسپارلانىپ وتىر -دەدى ءا.راباەۆ.
ەفير بارىسىندا 100-دەن استام سۇراق كەلىپ ءتۇستى. سۇراقتاردىڭ باسىم بولىگى تۇرعىن ءۇي كەزەگىنە قاتىستى بولدى. باسقارما باسشىسى بۇل ساۋالدارعا تۇرعىن ءۇي باسقارماسى جاۋاپتى ەكەنىن جانە قۇرىلىس سالاسىنا قاتىستى سۇراقتىڭ ءبارىن ءجىتى باقىلاۋعا الاتىنىن جەتكىزدى.
