قازاق تىلىنە اۋدارىلعان 18 وقۋلىقتىڭ جالپى تارالىمى 47 ميلليوننان اسادى. بۇل تۋرالى ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحانۇلى ايتتى.
- ءوزىڭىزدىڭ تاپسىرماڭىز بويىنشا وسى تاپسىرمانى ىسكە اسىرۋ ءۇشىن ۇكىمەتتىك ەمەس جانە كوممەرتسيالىق ەمەس نەگىزدە جۇمىس ىستەيتىن ۇلتتىق اۋدارما بيۋروسى قۇرىلدى. بۇگىن وسى اسا جاۋاپتى ءارى وزىندىك قيىندىقتارى دا كوپ جۇمىستىڭ العاشقى ناتيجەسىمەن تانىستىرۋدىڭ ءساتى كەلدى»، - دەپ اتاپ ءوتتى ول بۇگىن «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا جارىق كورگەن وقۋلىقتاردى ەلباسى نۇرسۇلتان نازارباەۆقا تانىستىرۋ بارىسىندا.
ونىڭ ايتۋىنشا، «100 وقۋلىق» جوباسى جاريالانا سالىسىمەن ەلىمىزدىڭ جوعارى وقۋ ورىندارىنان جالپى سانى 800-دەن اسا اۋدارىلۋى كەرەك دەگەن وقۋلىققا ۇسىنىس كەلىپ تۇسكەن.
- مامانداردان قۇرىلعان ارنايى جۇمىس توبى اۋدارىلاتىن وقۋلىقتارعا قويىلاتىن مىناداي تالاپتاردى انىقتادى: وقۋلىق دۇنيەجۇزىندەگى ماڭداي الدى 100 ۋنيۆەرسيتەتتىڭ باعدارلاماسىندا بولۋى كەرەك; كەمىندە ءۇش باسىلىم كورۋى ءتيىس; مازمۇنى وزەكتى ءارى يدەيالىق تۇرعىدان بەيتاراپ بولۋى كەرەك; سونىمەن بىرگە وقۋلىق زامان تالابىنا ساي ينتەراكتيۆتى وقىپ-ۇيرەنۋگە مۇمكىندىك بەرۋى قاجەت»، - دەدى راۋان كەنجەحانۇلى.
ۇلتتىق بيۋرو ديرەكتورىنىڭ اتاپ وتۋىنشە، وسىنداي تالاپتار نەگىزىندە فيلوسوفيا، الەۋمەتتانۋ، پسيحولوگيا، ءتىل ءبىلىمى، انتروپولوگيا مەن ءدىنتانۋ، جۋرناليستيكا، ەكونوميكا مەن كاسىپكەرلىك سالالارىن قامتيتىن العاشقى 18 وقۋلىق ىرىكتەلگەن.
- تاڭدالعان وقۋلىقتاردى جيناقتاپ ايتساق، بۇل وقۋلىقتار الەمنىڭ 42 ەلىندە 34 تىلدە باسىلىپ، جالپى تارالىمى 47 ميلليوننان اسقان. مۇنداي وقۋلىقتاردا مەملەكەتتىك باعدارلاما اياسىندا اۋدارىپ، تەگىن تاراتۋ الەمدە بالاماسى جوق تاجىريبە»، - دەدى ول.
ايتا كەتەيىك، استاناداعى نازارباەۆ ورتالىعىندا «قازاق تىلىندەگى 100 جاڭا وقۋلىق» جوباسى اياسىندا اۋدارىلعان العاشقى كىتاپتاردىڭ تانىستىرىلىمى ءوتىپ جاتىر. سالتاناتتى شاراعا قر پرەزيدەنتى نۇرسۇلتان نازارباەۆ قاتىسۋدا.
________________________________________________________________________
inform.kz
