مۇعالىمدەر ءوزىن-ءوزى تانۋ ءپانىن ورنىندا قالدىرۋدى سۇراپ وتىر، دەپ حابارلايدى “ادىرنا” ۇلتتىق پورتالى Orda.kz سايتىنا سىلتەمە جاساپ.
ءبىلىم جانە عىلىم مينيسترلىگى جانىنان قۇرىلعان ۇلتتىق اكادەميا «ءوزىن-ءوزى تانۋ» ءپانىن ەلەكتيۆتى پاندەر ساناتىنا كوشىرۋ جوباسىن ۇسىنىپ ۇلگەردى. ونى شاكىرتتەر ەڭ كوپ دەگەندە ءبىر وقۋ جىلى وقيدى. قازىر ساباق 1-11 سىنىپتار ارالىعىندا وقىتىلادى.
2021 جىلى ادامنىڭ ۇيلەسىمدى دامۋىنىڭ ۇلتتىق ينستيتۋتى اشىلىپ، بۇل جۇمىستى جالعاستىرۋى كەرەك ەدى.
«ينستيتۋت ۇجىمى مەن پروفەسسورلىق-وقىتۋشىلار قۇرامى ەلىمىزدىڭ ءاربىر وقىتۋشىسى ءوزىنىڭ كاسىبي ميسسياسىن – شاكىرتتەرىن ءبىلىم جولىنا جەتەلەۋ، تەرەڭ ءمانى مەن وشپەس ماڭىزىن اشا ءتۇسۋى ءۇشىن بارلىق قاجەتتى جاعدايلاردى جاسادى جانە جاساي بەرەدى. جالپىادامزاتتىق قۇندىلىقتار بويىنشا سارا الپىسقىزى تەك ەلىمىزدە عانا ەمەس، بۇكىل الەمدە گۋمانيستىك قۇندىلىقتاردى، ىزگىلىك پەن ادىلەتتىلىك مۇراتتارىن بەكىتۋگە وراسان زور ۇلەس قوسىپ كەلە جاتقان رۋحاني كوشباسشى جانە قوعام قايراتكەرى رەتىندە الەمدىك دەڭگەيدە ورىندى مويىندالدى» دەلىنگەن ينستيتۋتتىڭ سايتىندا.
اقپان ايىنىڭ باسىندا مۇعالىمدەر سارا نازارباەۆاعا ارنالعان «ماحاببات ءۇشىن ءومىر» تاقىرىبىندا ساباق وتكىزۋگە تۋرا كەلەتىنىن ايتىپ شاعىمدانعان. بالالارعا ءبىرىنشى پرەزيدەنتتىڭ ايەلى ادامنىڭ قىزمەتى مەن تاعدىرى تۋرالى نە ايتاتىنىن جەتكىزۋ كەرەك ەدى.
Ratel.kz سايتى حابارلاعانداي، كەيبىر مۇعالىمدەر مۇنىمەن كەلىسپەيدى. ولار قاسىم-جومارت توقاەۆتىڭ اتىنا ۇندەۋ جاريالاپ، مەملەكەتتىك ءبىلىم ستاندارتىندا «ءوزىن-ءوزى تانۋ» ءپانىن قالدىرۋدى سۇرايدى.
«ەگەر «ءوزىن-ءوزى تانۋ» ءپانى مەكتەپ باعدارلاماسىنان الىنىپ تاستالسا نەمەسە فاكۋلتاتيۆ ساناتىنا اۋىستىرىلسا، بۇكىل ءبىلىم بەرۋ جۇيەسى تەك مەكتەپتە عانا ەمەس، قوعامدا دا زارداپ شەگەدى. قاڭتارداعى قانداي دا ءبىر تەرروريستەر، توناۋشىلار جانە قالالارىمىزدىڭ الاڭدارى مەن كوشەلەرىندە دۇرلىكتىرگەن ارانداتۋشىلاردىڭ شىققانى الاڭداتادى. وسىنداي رۋحاني تاربيەسىز اگرەسسيۆتى، قاتىگەز، جەككورىنىشتى ۇرپاق شىعاتىنى بارىمىزگە اششى ساباق. «ءوزىن-ءوزى تانۋ» ءپانى ەلىمىزدىڭ قاۋىپسىزدىگىنىڭ، بىرلىگى مەن تۇتاستىعىنىڭ كەپىلى!» دەلىنگەن ۇندەۋ ماتىنىندە.
ۇستازداردىڭ ايتۋىنشا، بۇل ساباق ءوزىن جانە الەمدى تانيتىن تۇلعا تاربيەلەۋگە سەپتىگىن تيگىزەدى.
ءوزىن-ءوزى تانۋ – تۇڭعىش پرەزيدەنت نۇرسۇلتان نازارباەۆتىڭ جۇبايى سارا نازارباەۆانىڭ ۇسىنىسىمەن ەنگىزىلگەن ءپان. سارا الپىسقىزى ۇزاق جىلدار بويى «بوبەك» قايىرىمدىلىق قورىن باسقارىپ كەلەدى. سونىڭ نەگىزىندە وسى «ءوزىن-ءوزى تانۋ» باعدارلاماسى ازىرلەندى.
