قر پرەزيدەنتى قاسىم-جومارت توقاەۆ جەرگىلىكتى اكىمدىكتەرگە تۇرعىندارمەن تىعىز بايلانىس ورناتىپ، ازاماتتاردىڭ ماسەلەلەرىن دەر كەزىندە شەشۋدى تاپسىرعانى بەلگىلى. وسىعان وراي «اشىق ەسىك كۇنى» اياسىندا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان ازاماتتاردى جەكە ماسەلەلەرى بويىنشا قابىلدادى.
«تۇركىستان» سارايىندا وتكەن قابىلداۋعا كەلگەن ازاماتتار ءارتۇرلى ماسەلەلەردى قوزعادى. ماسەلەن، قالا تۇرعىنى بەرىك بەيسەنتاەۆ ەكى جاسار ۇلى ءاليمۇرا ىرىسكەلدىنىڭ 2021 جىلعى 15 جەلتوقساننان بەرى «اسار» شاعىن اۋدانىنداعى قالالىق بالالار اۋرۋحاناسىنىڭ جانساقتاۋ بولىمىندە جاتقانىن، ەمدىك شارالاردىڭ ناتيجەلى بولماي جاتقانىن ايتىپ كەلىپتى. سوعان بايلانىستى بالاسىن ەلورداداعى ەمدەۋ مەكەمەلەرىنە جولداۋعا كومەك كورسەتۋدى سۇرايدى.
قالا اكىمىنىڭ ءبىرىنشى ورىنباسارى قالالىق دەنساۋلىق ساقتاۋ باسقارماسىنىڭ وكىلدەرىنە ماسەلەنى نازارعا الۋدى تاپسىردى. ءوز كەزەگىندە بالانىڭ وتە دياگنوزى وتە كۇردەلى ەكەنىن، بارلىق قاجەتتى ەم تاعايىندالعانىن، سونىڭ ارقاسىندا قازىر نارەستە تۇتىك ارقىلى انا سۇتىمەن تاماقتاندىرىلا باستاعانىن جەتكىزدى. بالانىڭ جاعدايى تۇراقتالىپ، وزدىگىنەن تىنىس الاتىن جانە تاماقتاناتىن جاعدايعا جەتكەن كەزدە ونى وزگە ەمدەۋ مەكەمەسىنە اۋىستىرۋعا بولاتىنىن، وعان دەيىن تاسىمالداۋ قاۋىپتى ەكەنىن ءتۇسىندىردى.
شىڭعىس جۇمابەكۇلى بالانىڭ ساۋىعىپ كەتۋىنە تىلىكتەستىك ءبىلدىرىپ، ماسەلەنىڭ سوڭىنا دەيىن جەكە باقىلاۋىندا ۇستايتىنىن جەتكىزدى.
سونىمەن قاتار قابىلداۋعا كەلگەن ازاماتتار جۇمىسپەن قامتۋ، مەديتسينالىق قىزمەتتىڭ ساپاسى، مۇگەدەكتىك تاعايىنداۋ، الەۋمەتتىك كومەك الۋ جانە وزگە دە ماسەلەلەردى قوزعادى. قالا اكىمىنىڭ ءبىرىنشى ورىنباسارى بارلىق تۇرعىنداردىڭ شاعىمدارى مەن وتىنىشتەرىن جانە ۇسىنىستارىن مۇقيات تىڭداپ، بارلىعىنا جان-جاقتى جاۋاپ بەردى. قالا اكىمدىگىنىڭ تۇرعىندارمەن اشىق ديالوگ قۇرۋعا دايىن ەكەنىن ايتىپ، ماسەلەلەردىڭ زاڭ شەڭبەرىندە شەشىلەتىنىن جەتكىزدى.
