بۇگىن – العىس ايتۋ كۇنى

كەشەگى قيلى زاماندا قازاق حالقى تاعدىردىڭ جازۋىمەن ەلگە كەلگەن وزگە ەتنوس وكىلدەرىنە كەڭ قۇشاعىن جايىپ، باۋىرىنا تارتتى، ءبىر ءۇزىم نانىمەن ءبولىستى.

ستولىپين رەفورماسى كەزىندە ەلگە تۇتاس ەتنوستار دەپورتاتسيالاندى. ءتۇرلى ەتنوس وكىلدەرىن ۆاگوندارمەن اشىق دالاعا اكەپ تاستادى. ونسىز دا كۇنىن ارەڭ كورىپ وتىرعان قازاق وتباسىلارى ولاردى ۇيىنە كىرگىزىپ، قامقورلىق تانىتتى. XX عاسىردىڭ باسىندا قازاقستانعا بەلارۋس، رەسەي جانە ۋكراينادان 1,1 ميلليون ادام قونىس اۋداردى، ال 1930 جىلدارى ۇجىمداستىرۋ بارىسىندا 250 مىڭ شارۋا جەر اۋدارىلىپ، تاعى 1,2 ميلليونعا تارتا ادام ونەركاسىپ نىساندارىن تۇرعىزۋعا كەلگەن. ولاردىڭ ءبارى قازاقستاندا ورنىعىپ، قيىن كەزەڭدەردى قازاق حالقىمەن بىرگە ەڭسەردى. سوندىقتان ەلدەگى مەرەكەلەر قاتارىنىڭ العىس ايتۋ كۇنىمەن تولىعۋى يگىلىكتى ءىس بولدى. بۇل كۇننىڭ استارىندا قازاق حالقىنىڭ باۋىرمالدىعى مەن مەيىرىمدىلىگىنە ريزاشىلىق ءبىلدىرۋ جاتىر.

العىس ايتۋ كۇنى – قازاقستاندىق ءپاتريوتيزمنىڭ، بىرلىك پەن دوستىقتىڭ جارقىن مەرەكەسى. قازاقستان حالقى بۇل مەيرامدى العاش رەت 2016 جىلى اتاپ ءوتتى. 2016 جىلدىڭ 14 قاڭتارىندا قر تۇڭعىش پرەزيدەنتى – ەلباسى نۇرسۇلتان نازارباەۆ قازاقستان حالقى اسسامبلەياسىنىڭ قۇرىلعان كۇنىن، ياعني 1 ناۋرىزدى العىس ايتۋ كۇنى ەتىپ جاريالادى.

بۇل مەرەكەنىڭ ماقساتى – وسكەلەڭ ۇرپاقتى دوستىق، ءبىر-بىرىنە دەگەن قۇرمەت پەن تولەرانتتىلىققا، وتانسۇيگىشتىككە تاربيەلەۋ، قازاقستاندا ەتنيكارالىق كەلىسىم مەن ۇلتارالىق قارىم-قاتىناستى نىعايتۋ بولىپ تابىلادى.