قازاقستان رەسپۋبليكاسى پرەزيدەنتىنىڭ 2018 جىلعى 19 ماۋسىمداعى №702 جارلىعىمەن شىمكەنت قالاسىنا رەسپۋبليكالىق ماڭىزعا يە قالا مارتەبەسى بەرىلدى. بۇل قالانىڭ جەدەل دامىپ، تۇرعىندار سانىنىڭ كوبەيۋىنە ىقپال ەتتى. قازىردىڭ وزىندە شىمكەنتتە قالا تۇرعىندارىنىڭ 70 پايىزىنا جۋىعى جەكە سەكتوردا ءومىر ءسۇرىپ جاتىر. وسىعان وراي بۇگىندە كوپقاباتتى تۇرعىن ءۇي سالۋعا باسىمدىق بەرىلىپ وتىر.
قازاقستان رەسپۋبليكاسىنىڭ 2001 جىلعى 16 شىلدەدەگى №242 «قازاقستان رەسپۋبليكاسىنداعى ساۋلەت، قالا قۇرىلىسى جانە قۇرىلىس قىزمەتى» تۋرالى زاڭىنىڭ 47-1-بابىندا ەلدى مەكەننىڭ بەلگىلەنگەن تارتىپپەن بەكىتىلگەن باس جوسپارى نەگىزىندە ەلدى مەكەندەر اۋماقتارىنىڭ جەكەلەگەن بولىكتەرىن ەگجەي-تەگجەيلى جوسپارلاۋ جوبالارى ازىرلەنەدى. ەگجەي-تەگجەيلى جوسپارلاۋ جوبالارىنىڭ يگەرىلۋ مەرزىمى 5-10 جىل.
تالداۋ ناتيجەسىندە 2021 جىلى تۇران شاعىن اۋدانىنىڭ ەگجەي-تەگجەيلى جوسپارلاۋ جوباسىنا تۇزەتۋ ەنگىزۋ بويىنشا جۇمىستار جۇرگىزىلىپ، بىرنەشە نۇسقاسى ازىرلەندى.
الەۋمەتتىك جەلىلەر مەن تەلەارنالاردا تارالعان اقپاراتتاردا تۇران شاعىن اۋدانى تۇرعىندارىنىڭ الاڭداۋشىلىعىن تۋعىزعان مالىمەت – جوعارىدا ايتىلعان ەگجەي-تەگجەيلى جوبالاۋ جوسپارىنىڭ ءبىر نۇسقاسى عانا.
ول رەسمي تۇردە بەكىتىلمەگەن قۇجات.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىنا سايكەس، قالانىڭ دامۋىنا قاتىستى كەز كەلگەن ماسەلە تۇرعىنداردىڭ پىكىرى مەن كوزقاراسىن ەسكەرە وتىرىپ قابىلدانادى.
سوندىقتان زاڭ تالاپتارى مەن قۇرىلىس نورمالارىنا سايكەس تۇران شاعىن اۋدانىنىڭ ەگجەي-تەگجەيلى جوسپارلاۋ جوباسى ناقتى بەكىتىلمەي تۇرىپ، بۇل ماسەلە بويىنشا الدىن-الا قوعامدىق تىڭدالىم وتكىزىلەدى.
قوعامدىق تالقىلاۋدىڭ وتكىزىلەتىن ورنى مەن ۋاقىتى الدىن-الا بۇقارالىق اقپارات قۇرالدارىندا جانە الەۋمەتتىك جەلىلەر ارقىلى تۇرعىندارعا حابارلاناتىن بولادى.
قوعامدىق تىڭداۋدا تۇرعىندار ەگجەي-تەگجەيلى جوبالاۋ جوسپارىن بەكىتۋ ماسەلەسى بويىنشا داۋىس بەرەدى. ياعني، تۇپكىلىكتى شەشىمدى تۇرعىنداردىڭ وزدەرى قابىلدايدى.
وعان قوسا قازاقستان رەسپۋبليكاسىنىڭ زاڭدارى ازاماتتاردىڭ مەنشىك قۇقىعىن ەرەكشە قورعاۋعا الىپ، وعان كەپىلدىك بەرەدى. مەملەكەت ءوز ازاماتتارىنىڭ مۇلكىنەن زاڭسىز جولمەن ايىرىلۋىنا، باسپاناسىز قالۋىنا جول بەرمەيدى.
شىمكەنت قالاسىنىڭ بارشا تۇرعىندارىن قوعامدىق تالقىلاۋعا قاتىسۋعا جانە قالامىزدىڭ كوركەيۋى مەن دامۋى ءۇشىن ات سالىسۋعا شاقىرامىز.
