حالىقارالىق ۇيىمدار نەگىزسىز قۇرىلمايدى. ۇقشۇ-نىڭ نەگىزگى ماقساتى — الەمگە تونگەن قاۋىپ-قاتەردىڭ الدىن الۋ جانە جويۋ، سوعىستار مەن اسكەري قاقتىعىستاردى وقشاۋلاۋ، ءبىر نەمەسە بىرنەشە تاراپقا قاتىستى قارۋلى قاقتىعىستان بىرلەسە قورعانۋ. ال ەۋرازيالىق ەكونوميكالىق وداقتىڭ باستى ماقساتى — وداق شەڭبەرىندە تاۋارلاردىڭ، كورسەتىلەتىن قىزمەتتەردىڭ، كاپيتالدىڭ جانە ەڭبەك رەسۋرستارىنىڭ بىرىڭعاي نارىعىن قالىپتاستىرۋعا ۇمتىلۋ، جاھاندىق ەكونوميكا جاعدايىندا ۇلتتىق ەكونوميكالاردى جان-جاقتى جاڭعىرتۋ، كووپەراتسيالاۋ جانە ولاردىڭ باسەكەگە قابىلەتتىلىكتەرىن ارتتىرۋ.
شارتتارىنا قاراساڭىز، ەش ءمىن تابا المايسىز. تيگىزەر پايداسىنىڭ بار ەكەنىنە داۋىم جوق.
كەز كەلگەن ۇيىمدى العا سۇيرەيتىن لوكوموتيۆ ەلدەر بولادى. ال اتالعان ەكى ۇيىمنىڭ دا لوكوموتيۆى، ارينە — رەسەي.
رەسەيدى الەمنەن وقشاۋلاۋعا باعىتتالعان سانكتسيالار، رەسەي-ۋكراينا قاقتىعىسى، "مينسك", "بۋداپەشت" سياقتى كەلىسىمدەردى ءبىر ساتتە بۇزا سالۋ جانە ت.ب. ويلاندىرا، تولعاندىرا تۇسەدى ەكەن.
بىلتىر تۇركى مەملەكەتتەرى ۇيىمىنىڭ قۇرىلعانىن بىلەمىز. ۇقشۇ مەن ەاەو-عا التەرناتيۆا رەتىندە تۇركى مەملەكەتتەرى ۇيىمى ارقىلى دا اتالمىش ەكى باعىت بويىنشا كەلىسىمدەردى باستاي بەرۋ كەرەك دەگەن پىكىردەمىن.
قۋانىش جۇمابەكۇلى
«ەۋرازيا زەرتتەۋلەرى» ماماندىعى بويىنشا PhD دوكتورى
