قازاقستان ءۇشىن عارىش كەڭىستىگى وتە ماڭىزدى. سەبەبى العاش رەت عارىشتى يگەرۋ ءدال ءبىزدىڭ ەلدەن باستالدى. ادامنىڭ عارىشقا العاش ۇشۋى دا قازاقستان جەرىنەن باستاۋ الدى. مىنە، سول ۋاقىتتان بەرى 60 جىل زىمىراپ وتە شىقتى. ادامزات عارىشتى يگەرۋدى جالعاستىرىپ، تولاعاي جەتىستىكتەرگە جەتتى. ءتىپتى مارسقا قونىستانۋ، ايعا كەزەكتى ەكسپەديتسيا جىبەرۋ مەن وزگە پلانەتالاردى ىزدەستىرۋ جۇمىستارى ءجۇرىپ جاتىر. مەملەكەتتەر ءتۇرلى سپۋتنيكتەردى اۋىل شارۋاشىلىعى، اۋا رايىن باقىلاۋ، اسكەري سالادا قولدانىپ كەلەدى.
عارىشتى يگەرۋدى ناسيحاتتاۋ ماڭىزدى. جاس ۇرپاقتىڭ اسپان الەمىنە قىزىعىپ ءوسۋى - بولاشاقتا عارىش سالاسىنىڭ دامۋىنا دا اسەر ەتەدى. بۇل قازاقستان ءۇشىن ماڭىزدى. سەبەبى ءۇش عارىشكەر شىعارىپ، الەمدەگى ەڭ ءىرى عارىش كەشەنىنىڭ بىرىنە يە قازاقستان الداعى ۋاقىتتا عارىش سالاسىن قارقىندى دامىتۋعا نيەتتى. سول ماقساتتا وقۋشىلار مەن ستۋدەنتتەر اراسىندا ءتيىستى ءتۇسىندىرۋ جۇمىستارى دا جۇرگىزىلەدى.
قازاقستان رەسپۋبليكاسى تاۋەلسىزدىگىنىڭ 30 جىلدىعىنا جانە ادامنىڭ عارىشقا العاش ۇشقانىنا 60 جىل تولۋىنا وراي ارنايى «KazakhstanSmartSpace» عارىشتىق تەحنيكا جانە تەحنولوگيالار بويىنشا حالىقارالىق بايقاۋى ۇيىمداستىرىلۋدا. بايقاۋدىڭ باسقى ماقساتى جاس ۇرپاقتى عارىش الەمىنە قىزىقتىرۋ، ولارعا قولداۋ ءبىلدىرۋ جانە بۇل سالانى دامىتۋدىڭ ماڭىزدىلىعىن ءتۇسىندىرۋ. بايقاۋدى «ۇلتتىق عارىشتىق زەرتتەۋلەر مەن تەحنولوگيالار ورتالىعى» اق، «EurasianSpaseVentures» جشس، «قازاقستاندىق جوبالاردى
باسقارۋ ينستيتۋتى» قق ۇيىمداستىرۋدا.
بايقاۋعا قاتىسۋعا 50-دەن استام جوو-رى ءوتىنىش بىلدىرگەن. ولاردىڭ اراسىندا قازاقستاننان بولەك رەسەي، قىرعىزستان قاتىسۋشىلارى دا بار.
ۇيىمداستىرۋشىلار تاراپى: "بايقاۋ بيىل ءبىرىنشى مارتە ۇيىمداستىرىلىپ وتىر. بايقاۋدىڭ ءوتۋ بارىسىنا بايلانىستى مۇمكىن ونى جىل سايىنعى ءداستۇرلى بايقاۋعا ايلاندىراتىن شىعارمىز. قازىر ول جاعىن دا ويلانۋ ۇستىندەمىز. قاتىسۋشىلاردى تەك قانا باعالى سىيلىقپەن ماراپاتتاپ قويماي، سونىمەن بىرگە "بايقوڭىر" عارىش ايلاعىنا اپارۋدى دا جوسپارلاپ وتىرمىز", - دەدى.
Eurasian Space Ventures جەكە عارىشتىق كومپانياسىنىڭ باس ديرەكتورى، ەۋرازيالىق بانكتىڭ ديرەكتورلار كەڭەسىنىڭ مۇشەسى شۋحرات يبراگيموۆ اتالمىش بايقاۋ تالانتتى جاستار اراسىندا وزدەرىن كورسەتۋ مۇمكىندىگىمەن بىرگە، كاسىپكەرلەر ءۇشىن بىلىكتى كادرلاردى تابۋدىڭ جولى ەكەنىن دە ايتا كەتتى.
ء"بىز بۇگىن ەڭ الدىمەن ايماقتار بويىنشا عارىش سالاسىنا قىزىعىپ، ءوز ءومىرىن، بولاشاعىن عارىشتى يگەرۋ، سول بويىنشا جوبالار جاساۋدى قالايتىن جاستاردى تاپقىمىز كەلەدى. بۇل بايقاۋ سونداي جاستارعا ۇلكەن مۇمكىندىك بەرىپ، ءوز يدەيالارىن ىسكە اسىرۋعا جول اشادى. ءبىز قازىردىڭ وزىندە اەروعارىشتىق تەحنولوگيالاردى دامىتۋ ءۇشىن ESV عارىش حابىنىڭ ينكۋباتورىنا حالىقارالىق ستارتاپتار مەن كومپانيالاردى تارتىپ جاتىرمىز. بۇگىندە تسيفرلاندىرۋ قارقىنى وتە جوعارى جانە ول پروتسەسس توقتامايدى. عارىشتىق يندۋستريا سالاسى دا قارىشتاپ دامۋدا. بۇل بايقاۋ الەمگە قازاقستان مەن ايماقتىق مامانداردىڭ بلىكتىلىگىن كورسەتەتىن بولادى", - دەيدى يبراگيموۆ.
شۋحرات يبراگيموۆ بايقاۋ اياسىندا جەڭىمپازداردى انىقتاپ، ولاردىڭ جوبالارىن دامىتىپ، حالىقارالىق دارەجەدە شىعارۋ، تانىستىرۋ جاعىن دا قاراستىرىپ وتىرعانىن ايتتى.
بايقاۋعا قاتىسۋشىلار ءۇش توپقا بولىنەدى. 12 جاسقا دەيىنگى بالالار، ولار اتا-انالارىمەن بىرگە كوماندا جاساقتاۋىنا بولادى. 16 جاسقا دەيىنگى بالالار، ولاردىڭ دا اتا-انالارىمەن بىرگە كوماندا جاساقتاۋىنا بولادى جانە ءۇشىنشى توپ 16 جاستان اسقاندار. جارىسقا قاتىسۋشىلارعا ارنايى سەرتيفيكاتتار، ال جەڭىمپازدارعا باعالى قارجىلاي سىيلىقتار مەن ەستەلىك جادىگەرلەر تابىستالادى. بايقاۋعا قاتىسۋشىلار ءتورت نوميناتسيا بويىنشا باق سىنايدى: ماكەت; بەلسەندى مودەل، ءونىم، بەينەروليك; عىلىمي-زەرتتەۋ جوباسى; باسەكەگە قابىلەتتى روبوتتار. 15-ناۋرىزعا دەيىن قاتىسۋعا جوبا ۇسىنۋعا مۇمكىندىك بار. قاتىسۋدىڭ ەرەجەلەرى مەن شارتتارى كورسەتىلگەن قاعيدالار بايقاۋدىڭ www.kzsmart.space سايتىندا جاريالانعان. بايقاۋدىڭ فينالى 2022 جىلدىڭ 8-10 ءساۋىرى گ. داۋكەەۆ ات. الماتى ەنەرگەتيكا جانە بايلانىس ۋنيۆەرسيتەتىندە وتەدى.
"ادىرنا" ۇلتتىق پورتالى
