ورىس قىزى قازاقستاندا تۇراتىن ءوز ۇلتىنىڭ وكىلدەرىنە ارناپ، "قازاقستان مەنىڭ جەرۇيىعىم" اتتى فلەشموبتى باستادى، دەپ حابارلايدى “ادىرنا” ۇلتتىق پورتالى ەكسپرەسس ك. سايتىنا سىلتەمە جاساپ.
بۇل تۋرالى جۋرناليست ءوزىنىڭ Facebook پاراقشاسىندا جازدى. ول ءوز سوزىندە اقپاراتتىق سوعىس ارقىلى قازاقستانداعى بەيبىت ءومىردى بۇزعىسى كەلەتىندەرگە توتەپ بەرۋ كەرەكتىگىن اتاپ وتكەن.
"قازاقستانداعى ورىس ۇلتىنىڭ وكىلدەرى! اقپاراتتىق سوعىس ارقىلى كوپۇلتتى قازاقستانداعى بەيبىت ءومىردىڭ بۇزىلۋىنا جول بەرمەيمىز. جەرۇيىعىمىزدى ەشقاشان ساتپايمىز! قازاقستانداعى ورىستاردى الدەكىمدەر نەدەن قۇتقارماق؟ استا-توك داستارحان مەن بالالاردى شاقالاق كەزىنەن باققان اجەلەردىڭ ىستىق قۇشاعىنان با؟ ۇلى قازاق حالقىنىڭ ولشەۋسىز مەيىرىمدىلىگى مەن دانالىعىنان با؟ ءبىز قازاق ءتىلىن ۇيرەنۋگە دايىنبىز جانە ۇيرەنىپ تە جاتىرمىز. ويتكەنى شىن جۇرەكپەن، جان دۇنيەمىزبەن قازاق ۇلتىن جاقسى كورەمىز. جاڭا مەكتەپتەردىڭ ەسىكتەرىن ايقارا اشىپ جاتقانىنا قۋانىشتىمىز جانە ولاردىڭ قازاق ءتىلدى ەكەنى ءبىز ءۇشىن پروبلەما ەمەس! باستىسى، ى.التىنسارين ايتپاقشى، "كەل، بالالار، وقىلىق!" ءبىز بالالارىمىز بەيبىتشىلىكتە ءبىلىم العانىن قالايمىز. "قازاقستان مەنىڭ جەرۇيىعىم" اتتى فلەشموبىن باستايمىن", — دەپ جازدى جۋرناليست.
اۆتوردىڭ بۇل فلەشموبىن كوپتەگەن قازاقستاندىق قولداپ جاتىر. قازىردىڭ وزىندە بۇل جازبانى 2 مىڭ ادام ءبولىسىپ، تاعى 2 مىڭ جەلى قولدانۋشىسى ءلۇپىل قالدىرعان. 500-گە جۋىق ادام پىكىر قالدىرعان.
“ادىرنا” ۇلتتىق پورتالى
